د سوریې حکومت اعلان کړی چې د فرانسې ولسمشر امانویل مکرون به په نږدې راتلونکي کې دمشق ته رسمي سفر وکړي او د سوریې د انتقالي ولسمشر احمد الشرع سره به د دواړو هېوادونو د اړیکو، اقتصادي همکاریو او سیمهییزو بدلونونو په اړه خبرې وکړي. که دا سفر ترسره شي، نو د دواړو هېوادونو په اړیکو کې به له څه باندې یوې لسیزې وروسته یو مهم سیاسي بدلون وګڼل شي.
د فرانسې د ولسمشرۍ ماڼۍ (الیزه) هم دا سفر تایید کړی او ویلي یې دي چې مکرون به د دولتي چارواکو، پانګهوالو او د سترو فرانسوي شرکتونو د استازو په مشرۍ دمشق ته ولاړ شي. ټاکل شوې چې دواړه لوري د سیاسي او اقتصادي اړیکو د پراختیا، د سوریې په بیارغونه کې د فرانسې د ونډې او نورو ګډو موضوعاتو په اړه خبرې وکړي.
که دا سفر عملي شي، مکرون به د ۲۰۰۸ کال راهیسې لومړنی د فرانسې ولسمشر وي چې دمشق ته سفر کوي. د دواړو هېوادونو اړیکې په ۲۰۱۲ کال کې د بشار اسد د حکومت له لوري د اعتراضونو تر سخت ځپلو او د کیمیاوي وسلو د کارولو له تورونو وروسته تر ټولو ټیټې کچې ته ورسېدې او ډیپلوماتیکې اړیکې یې عملاً ودرېدې.
دا پرمختګ څو میاشتې وروسته له هغه رامنځته کېږي چې احمد الشرع د مکرون په بلنه پاریس ته سفر کړی و. هغه هلته د سیاسي انتقال، د سوریې د بیارغونې، د ترهګرۍ ضد مبارزې او د بندیزونو د کمولو په اړه له فرانسوي چارواکو سره خبرې کړې وې.
احمد الشرع وروسته له هغې واک ته ورسېد چې د هیئت تحریر الشام په مشرۍ ائتلاف د ۲۰۲۴ کال په ډسمبر کې دمشق ونیو او د اسد د کورنۍ څو لسیزې واکمني یې پای ته ورسوله. له هغه وروسته، د سوریې انتقالي حکومت هڅه کوي له عربي او لوېدیځو هېوادونو سره اړیکې عادي او د بیارغونې لپاره بهرنۍ پانګونه راجلب کړي.
د مکرون احتمالي سفر یوازې یو ډیپلوماتیک لیدنه نه ګڼل کېږي، بلکې ښایي د سوریې په اړه د اروپايي هېوادونو د سیاست د تدریجي بدلون نښه هم وي. خو د اړیکو د بشپړې عادي کېدو او پراخو همکاریو راتلونکی به د سوریې د سیاسي انتقال، امنیتي وضعیت او د اروپايي ټولنې د راتلونکو پرېکړو پورې تړلی وي.
