راپورونه ښيي چې د امریکا ولسمشر ډونالډ ټرمپ د غزې د اوربند له اعلان څو ورځې مخکې، د اسرائیل له لومړي وزیر بنیامین نتانیاهو سره په ټلیفوني خبرو کې په توندې لهجې غوښتي وو چې د اوربند وړاندیز ومني.
دغه روایت د «د رژیم بدلون: د ډونالډ ټرمپ د امپراتورۍ د ولسمشرۍ تر شا» په نوم کتاب کې خپور شوی، چې د نیویارک ټایمز خبریالانو، مګي هابرمن او جاناتان سوان، لیکلی دی.
د کتاب له مخې، ټرمپ د خبرو پر مهال نتانیاهو ته ویلي وو: «ټول یهودیان له تا ستړي شوي دي.» هغه همدارنګه ټینګار کړی و چې باید له هوکړې څخه شاته نه شي.
په کتاب کې ادعا شوې چې سټیو ویټکاف او جېرډ کوشنر له دې ټلیفوني اړیکې مخکې د سپینې ماڼۍ د دفتر مشرې سوزي وایلز ته خبرداری ورکړی و چې ښايي نتانیاهو د هوکړې د بدلون هڅه وکړي. د همدې اندېښنې له امله، ویټکاف او کوشنر هم د دې ټلیفوني خبرو برخه وو.
لیکوالان ادعا کوي چې ټرمپ په همدې خبرو کې نتانیاهو ته ویلي وو: «زه د اسرائیل تر ټولو ښه ملګری یم چې تر اوسه یې لرلی دی. دا هوکړه د اسرائیل لپاره ډېره مهمه ده.»
د کتاب د روایت له مخې، نتانیاهو تر دغو فشارونو وروسته د اوربند له طرحې سره موافقه وکړه او دوه ورځې وروسته یې له ټرمپ سره په ګډه خبري غونډه کې ګډون وکړ.
دا ادعاوې د یاد کتاب پر محتوا ولاړې دي او تر اوسه نه ډونالډ ټرمپ، نه بنیامین نتانیاهو او نه هم د امریکا او اسرائیل چارواکو د دغو ادعاوو په اړه رسمي څرګندونې کړې دي.
