ځايي سرچینو تلویزیون نیمروز ته ویلي چې د خیبرپښتونخوا ایالت د جنوبي وزیرستان د برمل سیمې پر یوه کور د مشکوک ډرون په برید کې درې ماشومان وژل شوي او لږ تر لږه د همدې کورنۍ څلور نور غړي ټپیان شوي دي.
د سرچینو په وینا، دا برید د شنبې په ورځ، د چنګاښ په ۱۴مه، د برمل تحصیل د نرګسي په سیمه کې شوی دی. ویل کېږي چې وژل شوي ماشومان د شپږو او پنځلسو کلونو ترمنځ عمرونه لرل. ټپیان د درملنې لپاره د وانا ولسوالۍ روغتون ته لېږدول شوي دي.
د پاکستان چارواکو تر اوسه د دې پېښې په اړه رسمي څرګندونې نه دي کړې او هېڅ فرد یا ډلې هم د برید مسؤلیت نه دی منلی.
دا پېښه داسې مهال رامنځته کېږي چې څو ورځې وړاندې هم پاکستاني رسنیو راپور ورکړی و چې د باجوړ ولسوالۍ په یوه مشکوک ډرون چاودنه کې د یوې کورنۍ درې غړي وژل شوي او لس نور ټپیان شوي وو.
د سیمې اوسېدونکو د دې برید په اړه د شفافو څېړنو غوښتنه کړې او وایي، په وروستیو میاشتو کې په برمل او شاوخوا سیمو کې د ورته مشکوکو ډرون بریدونو شمېر زیات شوی چې له امله یې ملکي وګړو ته مرګژوبله اوښتې ده.
