د امریکا ولسمشر ډونالډ ټرمپ، ایران د هرمز تنګي په یوه باروړونکې بېړۍ د ډرون برید او د اوربند د هوکړې په ماتولو تورن کړی دی.
ټرمپ د جمعې په ورځ په خپلې ټولنیزې شبکې «ټروت سوشیل» کې لیکلي چې ایران لږ تر لږه څلور ځانمرګي ډرونونه د هغو بېړیو پر لور توغولي چې د هرمز له تنګي څخه تېرېدې.
د هغه په وینا، له دغو ډرونونو څخه یوه د یوې باروړونکې بېړۍ له پاسنۍ عرشې سره لګېدلې، چې له امله یې بېړۍ ته زیان رسېدلی، خو خپل سفر ته یې دوام ورکړی دی.
د امریکا ولسمشر ادعا کړې چې امریکایي ځواکونو درې نور ډرونونه هم نسکور کړي دي.
ټرمپ دغه برید «د اوربند د هوکړې احمقانه سرغړونه» بللې او ویلي یې دي چې د دې برید مسئولیت د ایران پر غاړه دی.
تر دې وړاندې هم یو شمېر امریکایي چارواکو له رسنیو سره په خبرو کې ایران د دغې پېښې مسئول بللی و، خو د ایران چارواکو تر اوسه د دغو تورونو په اړه رسمي غبرګون نه دی ښودلی.
دا څرګندونې داسې مهال کېږي چې د هرمز تنګي د سمندري تګ راتګ د امنیت په اړه اندېښنې لا هم پر خپل ځای پاتې دي. هرمز تنګی د نړۍ د نفتو او نړیوال سمندري سوداګرۍ له مهمو لارو څخه ګڼل کېږي.
