د ونزوېلا چارواکو اعلان کړی چې د وروستیو مرګونو زلزلو د قربانیانو شمېر ۱۸۸ تنو ته لوړ شوی دی.
د چارواکو په وینا، تر اوسه لږ تر لږه یو زر او ۵۲۰ کسان ټپیان شوي او د زیانمنو سیمو د پلټنې او ژغورنې عملیات لا هم دوام لري.
چارواکو ویلي چې ښايي شاوخوا ۲۰۰ کسان لا هم تر خاورو لاندې بند پاتې وي او ژغورونکې ډلې د هغوی د راایستلو لپاره هڅې کوي.
په ورته وخت کې، راپورونه ښيي چې زرګونه کسان د دغو زلزلو له امله نادرکه شوي او د زیانونو ارزونه لا هم روانه ده.
یو شمېر هېوادونو او ملګرو ملتونو له ونزوېلا سره خواخوږي څرګنده کړې او د بشري مرستو د وړاندې کولو لپاره یې خپل چمتووالی اعلان کړی دی.
