یو شمېر کارپوهانو، د بشري حقونو فعالانو او د افغانستان پخوانیو چارواکو د سویس په ژنیو ښار کې په یوې غونډه کې خبرداری ورکړی چې د نجونو او ښځو پر زدهکړو د طالبانو د محدودیتونو دوام به افغانستان له ژورو ټولنیزو، اقتصادي او بشري ستونزو سره مخ کړي.
دغه غونډه د «همراه» بشري حقونو شبکې له خوا د ملګرو ملتونو د بشري حقونو شورا د غونډې په څنډه کې جوړه شوې وه. په دې ناسته کې «د طالبانو دیني مدرسې؛ ایډیولوژیک پیاوړتیا، جنسیتي ځورونه او د افغانستان راتلونکی ثبات» تر سرلیک لاندې یو راپور هم وړاندې شو.
د افغانستان د پخواني حکومت د سیمهییزو ارګانونو ادارې پخواني مرستیال تیمور شاران د راپور د موندنو د وړاندې کولو پر مهال وویل چې په افغانستان کې د دیني مدرسو شمېر اوس د عصري دولتي ښوونځیو له شمېر څخه اوښتی دی.
د هغه په وینا، دغه بهیر د جنسیتي تبعیض د پراخېدو او له زدهکړو څخه د نجونو د محرومیت د دوام لامل ګرځي.
د زدهکړو د حق په برخه کې د ملګرو ملتونو ځانګړې راپور ورکوونکې فریده شهید خبرداری ورکړ چې که اوسنی وضعیت دوام وکړي او نړیواله ټولنه اغېزمن اقدامات ونه کړي، د افغان نجونو او ښځو تعلیمي وضعیت به لا پسې خراب شي.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ هم د هېواد تعلیمي وضعیت د اندېښنې وړ وباله او د عصري زدهکړو د ملاتړ او د تعلیمي محدودیتونو پر وړاندې د جدي اقداماتو غوښتنه یې وکړه.
د بشري حقونو فعالې او څېړونکې فرشته عباسي د افغان نجونو د زدهکړو د حق پر ساتنې ټینګار وکړ او له نړیوالې ټولنې یې وغوښتل چې د دغه اساسي حق د خوندي کولو لپاره عملي ګامونه پورته کړي.
د افغانستان د عامې روغتیا پخوانۍ وزیرې ثریا دلیل هم وویل چې له زدهکړو او کاري بازار څخه د ښځو ایستل به د هېواد پر اقتصاد، روغتیايي سکټور او ټولنیز پرمختګ اوږدمهاله منفي اغېزې ولري.
د غونډې ګډونوالو له نړیوالې ټولنې وغوښتل چې د افغان نجونو د زدهکړو د حق د خوندي کولو لپاره لا زیات فشار او عملي اقدامات ترسره کړي.
