د تلویزیون نیمروز باخبره سرچینو ویلي چې د طالبانو یو پنځه کسیز پلاوی د دغې ډلې د بهرنیو چارو وزارت د ویاند عبدالقهار بلخي په مشرۍ د سې شنبې په ورځ له ترکیې څخه بروکسل ته سفر کوي.
د سرچینو په وینا، د پلاوي ټولو غړو ته ویزې صادرې شوې دي او ټاکل شوې د اروپایي ټولنې له چارواکو سره په یوه شاوخوا درې ساعته اوږده غونډه کې ګډون وکړي. دغه غونډه به د بروکسل په ښار کې د شپې له خوا ترسره شي.
طالب پلاوی د هغو افغان کډوالو د بېرته ستنولو د موضوع د ارزونې لپاره بروکسل ته بلل شوی چې د پناه غوښتنې دوسیې یې رد شوې دي. ویل کېږي چې په غونډه کې به پر یو شمېر نورو تخنیکي موضوعاتو هم خبرې وشي.
اروپایي کمېسیون ویلي چې دغه خبرې یوازې په تخنیکي کچه ترسره کېږي او د افغانستان د قانوني حکومت په توګه د طالبانو د رسمیت پېژندنې معنا نه لري.
بلجیم، چې د اروپایي ټولنې د بنسټونو کوربه هېواد دی، مخکې ویلي وو چې په عادي شرایطو کې طالب چارواکو ته ویزې نه ورکوي، خو د نړیوالو ژمنو له امله نه شي کولای د اروپایي ادارو له لوري د بلل شویو پلاوو د سفر مخه ونیسي.
د بلجیم د بهرنیو چارو وزارت د دوشنبې په ورځ تلویزیون نیمروز ته ویلي وو چې تر هغه مهاله د طالبانو پلاوي ته ویزې نه وې صادرې شوې. خو نیویارک ټایمز د دغه وزارت د ویاند لورنس سونن له قوله راپور ورکړی چې پنځه ویزې د دوشنبې په وروستیو ساعتونو کې صادرې شوې دي.
د راپور له مخې، یادې ویزې یوازې د یوې ورځې اعتبار لري. بلجیمي چارواکو د امنیتي دلایلو او عامه نظم د ساتنې په خاطر د پلاوي د سفر د نورو جزییاتو له خپرولو ډډه کړې ده.
سرچینې همدارنګه وایي چې د طالبانو د کورنیو چارو وزارت د بهرنیو اړیکو مرستیال هدایتالله پکتین هم د پلاوي په ترکیب کې شامل دی.
بروکسل ته د طالبانو د استازو بلنه په وروستیو ورځو کې د بشري حقونو بنسټونو، د ښځو د حقونو فعالانو، د اروپایي پارلمان د یو شمېر غړو او د افغانستان د مدني ټولنې د استازو له پراخو اعتراضونو سره مخ شوې ده.
منتقدان باور لري چې دغه ډول ناستې طالبانو ته سیاسي مشروعیت ورکوي، خو اروپایي ټولنه ټینګار کوي چې د غونډې موخه یوازې د کډوالۍ اړوند تخنیکي مسایل دي.
