جیډي ونس، د امریکا د ولسمشر مرستیال، ویلي چې د ایران د کنګل شویو شتمنیو ازادول به یوازې هغه مهال ترسره شي چې د تهران او واشنګټن ترمنځ مذاکرات مثبت پرمختګ ته دوام ورکړي.
ونس د دوشنبې په ماښام د سرطان په لومړۍ نېټه د دغو شتمنیو د لګښت په اړه د یوې پوښتنې په ځواب کې وویل چې امریکا له قطر څخه غوښتي څو د یوه داسې څارنیز میکانیزم په جوړولو کې مرسته وکړي چې د مالي سرچینو د مصرف څرنګوالی وڅاري.
هغه وویل چې قطر له دې غوښتنې سره موافقه کړې او چمتو دی د یادو مالي سرچینو د مصرف د څارنې په برخه کې همکاري وکړي.
د امریکا د ولسمشر مرستیال زیاته کړه چې دغه میکانیزم کولی شي هم د ایران د خلکو او هم د امریکا د اقتصاد د ځینو برخو، په ځانګړي ډول د امریکایي بزګرانو، په ګټه تمام شي.
خو ونس ټینګار وکړ چې د ایران د شتمنیو ازادول به یوازې د مذاکراتو له دوامدار پرمختګ سره تړلي وي او له عملي پرمختګ پرته به دا پروسه پر مخ ولاړه نه شي.
هغه وویل: «دا پیسې به ازادې نه شي، مګر دا چې موږ د مذاکراتو په بهیر کې دوامداره پرمختګ ووینو.»
ونس همدارنګه څرګنده کړه چې د ایران د کنګل شویو شتمنیو موضوع د دواړو هېوادونو ترمنځ د راتلونکو خبرو اترو له مهمو او اساسي موضوعاتو څخه ده.
د امریکا د ولسمشر د مرستیال دغه څرګندونې داسې مهال مطرح کېږي چې د ایران او امریکا استازي د وروستي تفاهم د عملي کېدو او د اړیکو د راتلونکو پړاوونو په اړه خپلو خبرو ته دوام ورکوي.
