مسعود پزشکیان، د ایران ولسمشر، هممهاله له امریکا سره د مستقیمو مذاکراتو د دوام په حال کې اعلان کړی چې د ایران ټول امنیتي او پوځي مشران د خبرو اترو له بهیر څخه ملاتړ کوي.
هغه د دوشنبې په ورځ د تهران پوهنتون کې د استادانو د بسیج د جوړېدو په مناسبت یوې غونډې ته وویل چې د ملي امنیت عالي شورا ټولو غړو د مذاکراتو له مسیر سره موافقه کړې ده.
پزشکیان د وروستیو انتقادونو په ځواب کې وویل: «ټولو لاسلیک کړی چې همدا لاره باید تعقیب شي، اوس که څوک اختلاف رامنځته کول غواړي، میدان ورته خلاص دی.»
د ایران ولسمشر زیاته کړه چې د خاتمالانبیا قرارګاه قوماندان، د پوځ او سپاه لوړپوړي قوماندانان او نور امنیتي بنسټونه د پرېکړې په بهیر کې حاضر وو او له ټاکل شوې تګلارې یې ملاتړ کړی دی.
د نوموړي په وینا، له امریکا سره د خبرو او مذاکراتو په اړه پرېکړه د ایران د امنیتي او سیاسي جوړښت په کچه په بشپړه اجماع شوې ده.
دا څرګندونې په داسې وخت کې کېږي چې د ایران او امریکا د وروستي تفاهم په اړه د ځینو سختدریځو سیاسي جریانونو له خوا پر حکومت نیوکې زیاتې شوې دي.
پزشکیان همدارنګه وویل چې حکومت د جګړې پر مهال له پوځي بنسټونو پراخ ملاتړ کړی او د اړتیا وړ مالي او ارزي سرچینې یې ورسپارلې دي.
د ایران د ولسمشر څرګندونې داسې مهال مطرح کېږي چې د تهران او واشنګټن استازي په سویس کې د وروستي تفاهم د عملي کېدو او راتلونکو پړاوونو په اړه خبرو ته دوام ورکوي او دغه بهیر لا هم د نړیوالو او کورنیو سیاسي بحثونو په مرکز کې قرار لري.
