جرمني رسنیو راپور ورکړی چې د دغه هېواد حکومت په استانبول کې له طالب استازو سره تر یوې محرمانه غونډې وروسته د شپږو نورو ډیپلوماتانو د منلو موافقه کړې ده.
د راپورونو له مخې، دغه هوکړه د جرمني چارواکو او طالب استازو ترمنځ د څو ورځنیو خبرو اترو په پایله کې د استانبول په یوه هوټل کې شوې ده.
د جرمني د کورنیو چارو وزارت تایید کړې چې د وزارت استازو او طالبانو ترمنځ «په تخنیکي کچه» خبرې شوې دي، خو د جزییاتو له ورکولو یې ډډه کړې ده. د جرمني د بهرنیو چارو وزارت هم په استانبول کې د دغې غونډې ترسره کېدل تایید کړي دي.
د راپورونو له مخې، د کورنیو چارو وزارت ترڅنګ د جرمني د بهرنیو چارو وزارت یو شمېر ډیپلوماتانو هم په دغو خبرو کې ګډون درلود.
طالبانو مخکې ویلي وو چې له جرمني څخه افغانستان ته د ایستل کېدونکو افغانانو د پېژندنې او د سفر اسنادو د برابرولو لپاره په دغه هېواد کې نورو قنسولي استازو ته اړتیا لري.
اوس مهال یوازې دوه قنسولي کارکوونکي چې له طالبانو سره تړاو لري، په جرمني کې فعالیت کوي او په برلین کې د افغانستان سفارت او په بن ښار کې قنسولګرۍ چارې پر مخ وړي.
راپورونه وایي چې د تېرې مې میاشتې په پای کې د افغان کډوالو د ایستلو یوه الوتنه د طالبانو د ډیپلوماتانو د شمېر د زیاتولو پر سر د اختلاف له امله ځنډېدلې وه.
دا پرمختګ په داسې حال کې رامنځته کېږي چې د جرمني د کورنیو چارو وزارت تازه اعلان کړی، له دې وروسته به کابل ته د افغان کډوالو د ایستلو الوتنې زیاتې شي او په میاشت کې تر درېیو الوتنو پورې ترسره کېدای شي.
جرمني رسنیو همدارنګه راپور ورکړی چې لږ تر لږه سل افغان وګړي چې په بېلابېلو جرمونو محکوم شوي، دا مهال د جرمني په زندانونو او د ایستلو په ځانګړو مرکزونو کې ساتل کېږي او افغانستان ته د بېرته لېږلو په نوملړ کې شامل دي.
