د پاکستان د ملي شورا غړي اسد قیصر اعلان کړی چې د افغانستان او پاکستان ترمنځ د سرحدي لارو د بندېدو له امله رامنځته شویو ستونزو د ارزونې او د سوداګرۍ د بیا احیا لپاره به د جولای په میاشت کې یوه لویه جرګه جوړه شي.
هغه د دوشنبې په ورځ د پاکستان د سوداګرۍ خونې له مسؤلینو سره په غونډه کې وویل چې د سرحدي دروازو دوامداره بندښت د پاکستان اقتصاد ته سخت زیانونه اړولي او ګڼ کاروبارونه یې له جدي ستونزو سره مخ کړي دي.
د نوموړي په وینا، په دې جرګه کې به د سوداګرۍ، صنعت او اقتصاد اړوند ټولې خواوې ګډون وکړي او د شته ستونزو د دوامدار حل لپاره به ګډ بحثونه ترسره شي.
اسد قیصر ټینګار وکړ چې تر هغو چې له افغانستان او د منځنۍ اسیا له هېوادونو سره سوداګریزې لارې په بشپړه توګه بېرته فعالې نه شي، پاکستان به د اقتصادي رکود او د سوداګریزو فعالیتونو د کمښت له ستونزې سره مخ وي.
هغه همدارنګه غوښتنه وکړه چې سیاسي اختلافات باید له اقتصادي اړیکو جلا وساتل شي او عادي خلک او سوداګر باید د سیاسي شخړو بیه ور نه کړي.
بل لور ته، د تورخم د سوداګرۍ خونې مسؤلینو ویلي چې د سرحدي لارو د بندېدو له امله شاوخوا دوه میلیونه کسان بېکاره شوي او سوداګرو تر اوسه نږدې ۲۷۸ میلیونه ډالره زیان لیدلی دی.
د راپورونو له مخې، د سوداګریزو لارو بندښت د خیبر پښتونخوا ایالت نږدې ۵۰ سلنه اقتصادي فعالیتونه اغېزمن کړي او یو شمېر شرکتونو او سوداګرو خپلې چارې د پاکستان نورو ښارونو ته انتقال کړې دي.
د افغانستان او پاکستان ترمنځ سرحدي لارې د پاکستاني ځواکونو او طالبانو ترمنځ له پوځي نښتو او کړکېچونو وروسته د نږدې اتو میاشتو لپاره له پراخو محدودیتونو او بندښتونو سره مخ شوې دي؛ داسې وضعیت چې دواړو هېوادونو ته یې د پام وړ اقتصادي زیانونه اړولي دي.
