الماني رسنیو راپور ورکړی چې د جرمني حکومت او طالبانو د تخنیکي او محرمانه خبرو په ترڅ کې افغانستان ته د هغو افغان اتباعو د اخراج د الوتنو پر زیاتولو هوکړه کړې چې په جرمني کې په درنو جرمونو محکوم شوي دي.
د «بیلد ام زونتاګ» او نورو الماني رسنیو د راپورونو له مخې، جرمني ښايي کابل ته د اخراج الوتنې تر درېیو الوتنو په میاشت یا یوې الوتنې په اوونۍ کې زیاتې کړي.
د راپورونو پر بنسټ، د ځانګړو چارټر الوتنو تر څنګ به د عادي مسافرو الوتنو له لارې هم د افغان کډوالو د بېرته ستنولو امکان برابر شي.
تاګسشاو راپور ورکړی چې د جرمني د کورنیو چارو وزارت هڅه کوي افغانستان ته د اخراج لپاره یو ثابت هوايي مسیر رامنځته کړي.
د راپور له مخې، دغه پروګرام تر ډېره هغه کسان په نښه کوي چې د درنو جرمونو مرتکبین یا امنیتي خطر بلل شوي او دا مهال د جرمني په زندانونو یا د اخراج په ځانګړو مرکزونو کې ساتل کېږي.
الماني رسنیو لیکلي چې اوس مهال لږ تر لږه ۱۰۰ افغان اتباع د اخراج لپاره چمتو شوي دي.
د جرمني د کورنیو چارو وزیر الکساندر دوبرینت ویلي: «افغانستان ته د مجرمینو اخراج به په منظم او باوري ډول ترسره کېږي.»
هغه ټینګار کړی چې د درنو جرمونو مرتکبین باید جرمني پرېږدي او حکومت به دا تګلاره په جدي ډول عملي کړي.
په ورته وخت کې، د بشري حقونو یو شمېر بنسټونو پر دې بهیر نیوکې کړې دي. د «پرو اسایل» سازمان خبرداری ورکړی چې دا ډول همکارۍ ښايي له طالبانو سره د اړیکو د عادي کېدو لامل شي.
د دغه سازمان اجرائیوي مشرې هلن روزنه ویلي چې افغانستان ته د کډوالو د اخراج په موخه همکاري، له بشري حقونو او بهرنۍ پالیسۍ دواړو اړخونو اندېښمنوونکې ده.
راپورونه دا هم ښيي چې طالبانو مخکې یوه پلان شوې اخراجي الوتنه لغوه کړې وه او د جرمني له حکومت څخه یې په دې هېواد کې د خپلو ډیپلوماتانو د شمېر د زیاتولو غوښتنه کړې وه.
تلویزیون نیمروز نه شي کولای د راپورونو ټول جزئیات په خپلواکه توګه تایید کړي.
