د فرانسې ولسمشر امانوئل مکرون د هغو ځانګړو مرکزونو له جوړولو سره مخالفت څرګند کړی چې ټاکل شوې د اروپایي اتحادیې له خاورې بهر د هغو پناه غوښتونکو د انتقال لپاره جوړ شي چې د پناه غوښتنې غوښتنلیکونه یې رد شوي دي.
دغه دریځ په داسې حال کې اعلان شوی چې د اروپایي اتحادیې د کډوالۍ او پناه غوښتنې نوی تړون د ۲۰۲۶ کال د جون له ۱۲مې نېټې راهیسې د عملي کېدو پړاو ته داخل شوی دی.
د اروپایي هېوادونو له ډلې ځینې هېوادونه، په ځانګړي ډول جرمني، د دغو مرکزونو د جوړولو ملاتړ کوي او باور لري چې دا کار به د هغو کسانو د بېرته ستنولو بهیر اسانه کړي چې د اقامت قانوني حق نه لري.
خو مکرون ویلي چې فرانسه له دې طرحې ملاتړ نه کوي.
هغه ویلي: «د فرانسې په اړه زموږ ځواب د بېرته ستنولو مرکزونو ته منفي دی، ځکه زه فکر نه کوم چې دا مرکزونه اغېزمن وي او نه باور لرم چې دا طرحه زموږ له اصولو او ارزښتونو سره برابره ده.»
د اروپایي اتحادیې د کډوالۍ او پناه غوښتنې نوی تړون چې په ۲۰۲۴ کال کې تصویب شوی و، د بهرنیو پولو د کنټرول پیاوړتیا، د پناه غوښتنې د دوسیو چټک ارزونه او د هغو کسانو د بېرته ستنولو د بهیر ښه کول هدف ګرځولي چې د استوګنې اجازه نه ترلاسه کوي.
سره له دې، د مهاجرت د مدیریت پر څرنګوالي د اروپایي اتحادیې د غړو هېوادونو ترمنځ اختلافونه لا هم دوام لري او دا موضوع د اتحادیې له مهمو سیاسي ننګونو څخه ګڼل کېږي.
د نیمروز له نظره، د مکرون دریځ ښيي چې د کډوالۍ د سیاست په اړه په اروپا کې لا هم بشپړ توافق نشته او د مهاجرت مسئله به د راتلونکو کلونو لپاره د اروپایي سیاست یوه مهمه موضوع پاتې شي.
