د اروپا پارلمان غړې هانا نیومن د طالبانو له لوري د افغانستان په دولتي ادارو کې د سمارټ فونونو د کارولو پر بندیز نیوکه کړې او دا اقدام یې د معلوماتو د کنټرول او د افغانستان د خلکو او نړۍ ترمنځ د اړیکو د محدودولو یوه هڅه بللې ده.
نیومن د جمعې په ورځ په اېکس ټولنیزې شبکې کې ولیکل چې طالبان ښه پوهېږي د ښځو د اعتراضونو انځورونه، د بشري حقونو د سرغړونو راپورونه او د دې ډلې د تګلارو افشا کېدل د هغوی پر ټولنیز کنټرول اغېز کوي.
د هغې په وینا، طالبان هڅه کوي د معلوماتو جریان محدود کړي، د سرکوب پېښې پټې وساتي او د مخالفو غږونو د خپرېدو مخه ونیسي.
د اروپا پارلمان دغې غړې ویلي چې استبدادي نظامونه له یو بل څخه زده کړه کوي او پوهېږي چې د معلوماتو کنټرول د واک د کنټرول معنا لري.
نیومن له اروپايي ټولنې وغوښتل چې د افغانستان وروستي بدلونونه له نږدې وڅاري او د معلوماتو د لاسرسي پر وړاندې د زیاتېدونکو محدودیتونو په اړه چوپه خوله پاتې نه شي.
هغې خبرداری ورکړ چې دا ډول اقدامات کولی شي افغانستان لا زیات منزوي کړي او د دغه هېواد او نړۍ ترمنځ واټن نور هم پراخ کړي.
هانا نیومن په خپل پیغام کې لیکلي: «هغه څه چې د هرات د ښځو د غږ په خاموشولو پیلېږي، په پای کې د یوې ټولنې د نړۍ له اړیکو د پرې کولو په هڅه بدلېږي.»
د نوموړې څرګندونې وروسته له هغې مطرح شوې چې د طالبانو پوځي محکمې په یوه رسمي مکتوب کې د دولتي کارکوونکو لپاره د سمارټ فونونو کارول منع اعلان کړل.
د دغه مکتوب له مخې، که یو کارکوونکی له دې امر څخه سرغړونه وکړي، د هغه ټیلیفون به ضبط یا مات شي او قضیه به یې پوځي محکمې ته راجع شي.
د نیمروز له نظره، د معلوماتو او مخابراتي وسایلو په اړه هر ډول محدودیت یوازې تخنیکي موضوع نه ده، بلکې د بیان ازادۍ، د معلوماتو لاسرسي او د ټولنې او نړۍ ترمنځ د اړیکو له پراخې مسئلې سره تړاو لري. همدې موضوع د نړیوالو بنسټونو او سیاستوالو پام ځان ته اړولی دی.
