د آلمان د نورنبرګ ښار یو شمېر مېشتو افغانانو د یوې اعتراضي غونډې په ترڅ کې د افغانستان پر ښځو او نجونو د طالبانو لګول شوي محدودیتونه وغندل.
په دې غونډه کې لسګونو افغانانو او مدني فعالانو ګډون کړی و. ګډونوالو د «ښځه، ژوند، ازادي»، «زده کړه زموږ حق دی» او «کار، زده کړه او ازادي د افغان ښځو اساسي حق دی» په څېر شعارونه ورکړل او له نړیوالې ټولنې یې وغوښتل چې د افغانستان د ښځو وضعیت ته لا ډېره پاملرنه وکړي.
اعتراض کوونکو ټینګار وکړ چې د افغان ښځو غږ به خاموش نه شي او دوی به خپلو مدني او سولهییزو فعالیتونو ته دوام ورکړي.
په دې غونډه کې یو شمېر آلماني وګړو هم ګډون کړی و او د افغان ښځو سره یې د یووالي او ملاتړ څرګندونه وکړه.
ګډونوالو د ښځو او نجونو لپاره د اساسي حقونو، په ځانګړي ډول د زده کړې، کار او په ټولنه کې د آزاد حضور د حق د تضمین غوښتنه وکړه.
اعتراض کوونکو له ملګرو ملتونو، اروپایي ټولنې او نورو نړیوالو بنسټونو وغوښتل چې د افغانستان د ښځو د حقونو د خوندیتوب لپاره پر طالبانو لا زیات فشار وارد کړي.
دوی همدارنګه د هغه څه پر وړاندې نیوکه وکړه چې د طالبانو سیاسي مشروعیت ورکول یې وبلل او غوښتنه یې وکړه چې د افغانستان د سفارتونو له لارې د دې ډلې استازو ته رسمي مشروعیت ور نه کړل شي.
ګډونوالو وویل چې تر هغه وخته به خپلو مدني فعالیتونو او اعتراضونو ته دوام ورکړي چې د افغانستان د ښځو او خلکو غږ په نړیوالو فورمونو کې واورېدل شي.
دغه اعتراض داسې مهال ترسره کېږي چې د افغانستان د ښځو او نجونو پر وړاندې د محدودیتونو موضوع لا هم د بشري حقونو د سازمانونو، مدني فعالانو او نړیوالو بنسټونو د اندېښنو له مهمو موضوعاتو څخه ګڼل کېږي.
د نیمروز له نظره، د بهر مېشتو افغانانو دا ډول مدني فعالیتونه ښيي چې د افغانستان د ښځو د حقونو موضوع لا هم د نړیوالو بحثونو یوه مهمه برخه ده او د افغان کډوالو مدني حضور د دې موضوع د ژوندي ساتلو لپاره دوام لري.
