د ناروې د پلازمېنې اسلو یوې محکمې ماریوس بورګ هویبي، د دغه هېواد د ولیعهد ناسکه زوی، د جنسي تېري، تاوتریخوالي او د نشهيي توکو اړوندو جرمونو په قضیه کې په څلور کاله بند محکوم کړی دی.
د محکمې د پرېکړې له مخې، ۲۹ کلن هویبي د هغه پر ضد له ۴۰ مطرح شویو تورونو څخه په ۳۴ مواردو کې مجرم پېژندل شوی دی.
په دغو تورونو کې د جنسي تېري دوه پېښې، د خپلې پخوانۍ شریکې پر وړاندې تاوتریخوالی، د نشهيي توکو اړوند جرمونه او د ځینو قضایي حکمونو نقض شامل دي.
محکمې ویلي چې نوموړی د جنسي تېري په دوو دوسیو کې مجرم بلل شوی، خو د همدې ډول دوو نورو تورونو څخه برائت ورکړل شوی دی.
دغه حکم د یوې اووه اوونیزې محاکمې له پای ته رسېدو وروسته صادر شوی؛ هغه قضیه چې په وروستیو میاشتو کې یې په ناروې کې پراخ غبرګونونه راپارولي او د عامه افکارو پام یې ځان ته اړولی و.
څارنوالانو د محاکمې پر مهال ویلي وو چې څلورو ښځو هویبي د جنسي تېري په تور تورن کړی او ادعا یې کړې وه چې ځینې قربانیانې د پېښو پر مهال د ځان د دفاع یا مقاومت توان نه درلود.
د قضیې د څېړنې پر مهال د نشهيي توکو د استعمال، شخصي ویډیوګانو او د هغه د شخصي اړیکو اړوند سلګونه پیغامونه هم ارزول شوي دي.
ماریوس بورګ هویبي ټول درانه تورونه رد کړي وو، خو د ۳.۵ کیلوګرامه ماریجوانا د لېږد، د تماس د منع د حکم د نقض او ځینو ترافیکي سرغړونو منل یې تأیید کړي وو.
څارنوالۍ له محکمې غوښتي وو چې نوموړي ته اووه کاله او اووه میاشتې د بند سزا ورکړي.
د هویبي مدافع وکیل اعلان کړی چې د محکمې د وروستۍ پرېکړې پر وړاندې به د استیناف غوښتنه وکړي.
ماریوس بورګ هویبي د ناروې د ولیعهد د مېرمنې له پخوانۍ اړیکې زوی دی. که څه هم نوموړی کوم رسمي شاهي لقب یا دولتي مسئولیت نه لري، خو د شاهي کورنۍ له غړو سره د نږدې اړیکو له امله تل د رسنیو د پاملرنې په مرکز کې پاتې شوی دی.
د نیمروز له نظره، دا قضیه په ناروې کې د قانون د حاکمیت، د عدلي بنسټونو د خپلواکۍ او د لوړپوړو او مشهورو څېرو پر وړاندې د قضایي چلند په اړه پراخ بحثونه راپارولي دي.
