د پولنډ سرحدي ځواکونو د دوشنبې په ورځ اعلان وکړ چې ۴۵ کډوال یې د لیتوانیا له خاورې څخه پولنډ ته د ناقانونه ننوتلو په تور نیولي دي.
د پولنډي چارواکو په وینا، په نیول شویو کسانو کې د افغانستان، سومالیا، سوډان او ایتوپیا اتباع شامل دي.
سرحدي ځواکونو همدارنګه د اوکراین یوه ۵۲ کلنه ښځه نیولې ده چې د انسانانو د قاچاق په قضیه کې پرې د لاس لرلو تور لګېدلی دی.
چارواکي وایي، دغه ښځه د کډوالو د ناقانونه لېږد د تنظیم او همغږۍ په برخه کې د ګډون په تور تر څېړنو لاندې ده.
د پولنډ د سرحدي ادارې په وینا، ټول نیول شوي کډوال د دواړو هېوادونو ترمنځ د موجودو هوکړو له مخې بېرته لیتوانیا ته ستانه کړل شوي دي.
په وروستیو کلونو کې د لیتوانیا او پولنډ ترمنځ پوله د هغو کډوالو او پناه غوښتونکو له مهمو لارو څخه ګرځېدلې چې هڅه کوي د لوېدیځې اروپا هېوادونو ته ځان ورسوي.
د اروپايي ټولنې غړو هېوادونو د ختیځو پولو له لارې د ناقانونه اوښتو د زیاتېدو په غبرګون کې امنیتي او کنټرولي تدابیر سخت کړي دي.
په وروستیو میاشتو کې لسګونه کډوال، چې یو شمېر افغانان هم پکې شامل دي، د پولنډ، لیتوانیا او د ختیځې اروپا د نورو هېوادونو په پولو کې نیول شوي دي.
د نیمروز له نظره، د کډوالۍ او سرحدي کنټرول موضوع لا هم د اروپايي ټولنې له مهمو سیاسي او امنیتي ننګونو څخه ده، ځکه د جګړو، بېوزلۍ او بېثباتۍ له امله د کډوالۍ فشار لا هم دوام لري.
