باراک اوباما، د امریکا پخواني ولسمشر، ټینګار کړی چې واشنګټن نه شي کولای یوازې د پوځي ځواک او بمبار له لارې د ایران په اړه یوې تلپاتې حللارې ته ورسېږي او باید پراخې ډیپلوماسۍ ته مخه کړي.
اوباما دا څرګندونې د «دې اوونۍ» په نوم د اېبيسي نیوز له خپرونې سره په مرکه کې کړې دي. نوموړي ویلي چې د یوه ښه تړون لپاره خبرې اترې د یوې پراخې جګړې په پرتله غوره انتخاب دی، حتی که د امریکا ټولې غوښتنې هم پکې پوره نه شي.
هغه د ۲۰۱۵ کال اټومي تړون ته په اشارې ویلي چې نه باور لري کوم نوی احتمالي تړون به د پخواني تړون په پرتله بنسټیز توپیر یا د پام وړ پرمختګ ولري.
د امریکا پخواني ولسمشر ټینګار کړی چې د هغه د واکمنۍ پر مهال رامنځته شوی اټومي تړون، د امریکا تر وتلو وړاندې، د اوږدې مودې لپاره اغېزمن ثابت شوی و.
اوباما ویلي چې د تهران او واشنګټن ترمنځ د اوسنیو خبرو اترو ستونزمن بهیر ښيي چې د نړیوالو پیچلو شخړو حل کول وخت، سیاسي تعامل او دوامدارې ډیپلوماسۍ ته اړتیا لري.
هغه زیاته کړې: «واشنګټن نه شي کولای یوازې د زور یا بمبار له لارې حل ته ورسېږي، بلکې باید پراخې ډیپلوماسۍ ته مخه کړي. داسې ښکاري چې موږ باید تر اوسه دا درس زده کړی وای.»
د اوباما څرګندونې په داسې حال کې مطرح کېږي چې په وروستیو اوونیو کې د ایران او امریکا ترمنځ د احتمالي نوي توافق په اړه راپورونه زیات شوي او د دواړو لورو ترمنځ ډیپلوماټیک فعالیتونه هم پراخ شوي دي.
د دې موضوع اهمیت په دې کې دی چې د امریکا د یوه پخواني ولسمشر څرګندونې کولی شي د ایران په اړه د واشنګټن د راتلونکو سیاستونو او د نړیوالو ډیپلوماټیکو هڅو په اړه بحثونه لا پسې تود کړي.
