طالبانو د هېواد په کچه د طبي اگزیت ازموینه د نږدې ۷۰۰۰ نارینه فارغانو په ګډون ترسره کړه، خو ښځینه فارغان د څلورم پرلهپسې کال لپاره له ګډون څخه محرومې پاتې شوې.
دا ازموینه د ډاکټرانو لپاره د کار جواز ترلاسه کولو او مسلکي فعالیت پیلولو لپاره لازمي ده، خو د ښځو نه ګډون په عملي ډول د هغوی د کار مخه نیسي.
یو شمېر ښځینه فارغان وایي چې له کلونو زده کړو وروسته اوس نه شي کولای خپل مسلکي ژوند پیل کړي.
په داسې حال کې چې افغانستان له جدي روغتیايي کمښت، په ځانګړي ډول د ښځینه ډاکټرانو له نشتوالي سره مخ دی، نړیوالو بنسټونو هم خبرداری ورکړی چې میلیونونه ښځې اساسي روغتیايي خدماتو ته لاسرسی نه لري.
راپورونه ښيي چې افغانستان لا هم د زېږون لپاره له تر ټولو خطرناکو هېوادونو څخه دی او د میندو د مړینې کچه لوړه ده.
کارپوهان وایي چې د ښځو پر زدهکړو او کار بندیزونه د هېواد روغتیايي سیستم له جدي خطر سره مخ کړی او که دا وضعیت دوام وکړي، ښايي بحران نور هم ژور شي.
