د طالبانو استخباراتو د طلوعنیوز دوه خبریالان عمران دانش او منصور نیازي نیولي دي.
طلوعنیوز د دغه خبر په تایید ویلي چې طالبانو د رسنۍ مسئولانو ته ویلي، د پېښې جزییات به «له قانوني څېړنو وروسته» شریک شي.
تر دې وړاندې سرچینو ویلي وو چې منصور نیازي د ثور په ۱۷مه، د پنجشنبې په ورځ، د کابل د کارتهڅلور سیمې څخه نیول شوی او نامعلوم ځای ته انتقال شوی دی.
طلوعنیوز لومړی دغه خبر د «بازداشت» په اصطلاح خپور کړی و، خو وروسته یې خبر حذف او د «بازداشت» پر ځای یې د «توقیف» کلمه وکاروله.
طالبانو تر اوسه په رسمي ډول د دغو دوو خبریالانو د نیولو د علت په اړه څه نه دي ویلي.
طلوعنیوز په افغانستان کې د طالبانو له بیا واکمنېدو وروسته، د طالبانو د رسنیزو اصولو او پالیسو له مخې په خپل نشراتي سیاست کې پراخ بدلونونه راوستي او خپلو فعالیتونو ته یې دوام ورکړی دی.
تر دې وړاندې د طلوعنیوز رئیس فریدالله محمدي ویلي وو چې په افغانستان کې د رسنیو «نسبي ازادي» د سیمې د هېوادونو په کچه بېسارې ده.
دا په داسې حال کې ده چې د طالبانو استخباراتو د پنجشنبې په ورځ د «پیگرد» خبري آژانس مسئول احمد جاوید نیازي هم په کابل کې نیولی و او تر اوسه یې د برخلیک په اړه معلومات نه دي خپاره شوي.
د خبریالانو او رسنیزو فعالانو د نیولو دوام د بیان ازادۍ، د خبریالانو د خوندیتوب او په افغانستان کې د خپلواکو رسنیو د راتلونکي په اړه اندېښنې زیاتې کړې دي.
د بیان ازادۍ ملاتړي بنسټونه وایي، امنیتي فشارونه او د خبریالانو نیول د افغانستان رسنیزه فضا لا نوره محدوده کوي او د آزادو معلوماتو جریان له خطر سره مخامخوي.
