په تخار ولایت کې ځايي سرچینې وایي چې د ولایتي تخصصي روغتون د ماشومانو د ځانګړې پاملرنې (ICU) څانګه کې یو خونړی برید شوی دی.
د سرچینو په وینا، پېښه هغه مهال پیل شوه چې ډاکترانو د ناروغانو له ملګرو وغوښتل د روغتون د اصولو له مخې د ښځینه څانګې ته له ننوتلو ډډه وکړي، چې دا خبره لفظي شخړې ته واوښته.
څو دقیقې وروسته، یو کس د چاقو سره د ډاکترانو استراحت خونې ته ننوت او برید یې پیل کړ.
د دې برید په نتیجه کې څلور تنه سخت ټپیان شوي او شاوخوا لس نور کسان هم ټپیان دي.
سرچینې زیاتوي چې دا په همدې روغتون کې پر کادرونو درېیم برید دی، چې د روغتیايي مرکزونو د امنیت په اړه اندېښنې زیاتوي.
په غبرګون کې، ډاکترانو د روغتونونو د امنیت د تأمین لپاره د عاجلو اقداماتو غوښتنه کړې او خبرداری یې ورکړی چې د دې وضعیت دوام به د کادرونو حضور کم او د درملنې سیستم لا پسې کمزوری کړي.
