د طالبانو د سرحدونو، قومونو او قبایلو چارو وزیر نورالله نوري په بلخ ولایت کې یوې غونډې ته ویلي چې په افغانستان کې موجود امنیت او خپلواکي حتی په ډېرو پرمختللو هېوادونو کې هم نه لیدل کېږي.
هغه د خپلو خبرو پر مهال د هېواد د ځمکنۍ بشپړتیا پر ساتنې ټینګار وکړ او ویې ویل چې د افغانستان له خاورې دفاع د ټولو وګړو ګډ ملي مسئولیت دی.
نوري زیاته کړه: «له واخان تر نیمروز، له بولدک او تورخم تر حیرتان او شیرخان، حتی یو بلست خاوره هم زموږ له سر او جان څخه قیمتي ده.»
دا څرګندونې په داسې حال کې کېږي چې د افغانستان د امنیت، سرحدي وضعیت او داخلي شرایطو ارزونه لا هم په کورني او نړیواله کچه د بحث موضوع ده.
منتقدان وایي چې د امنیت په اړه رسمي څرګندونې باید د خلکو د ورځني وضعیت او موجودو ننګونو له واقعیتونو سره هم پرتله شي.
