د افغانستان پېژندل شوی رزمیکار واحدالله نژند ټاکل شوې چې د ارجنټاین له سیال لورئانو استاروپولي سره مخامخ شي.
دا سیالي به د راتلونکې شنبې په ورځ د «FNC» آزادو مبارزو د سازمان د دېرشم پړاو سیالیو په ترڅ کې د کرویشیا په زادار ښار کې ترسره شي.
د راپورونو له مخې، دا مبارزه به د ۷۷ کیلوګرام وزن په کټګورۍ کې وي او دواړه لوبغاړي به د «کرشیمیر چاسیچ» په سالون کې یو بل ته مخامخ شي.
واحدالله نژند تر دې دمه په خپل مسلکي کارنامه کې ۱۰ بریاوې او ۲ ماتې ثبت کړې دي، په داسې حال کې چې د هغه سیال لورئانو استاروپولي ۱۳ بریاوې او ۷ ماتې لري.
دا سیالي د افغان رزمي ورزش لپاره مهمه بلل کېږي، ځکه نژند هڅه کوي په نړیوالو ډګرونو کې د افغانستان نوم لا روښانه کړي.
