بریتانوۍ رسنیو راپور ورکړی چې عبدالولي ماموزی، د افغانستان د پخواني پوځ غړی چې له بریتانوي ځانګړو ځواکونو سره یې همکاري کړې وه، د انګلستان په برکنل ښار کې وژل شوی دی.
د «سان» ورځپاڼې د راپور له مخې، دا پېښه د مې په ۴مه د یوه مارکېټ د پارکینګ په ساحه کې د شخړې پر مهال رامنځته شوې، او پولیسو د دې قضیې په تړاو څلور کسان نیولي دي.
ماموزی شاوخوا اووه میاشتې مخکې د افغانانو د بیا مېشتېدو له لارې بریتانیا ته رسېدلی و. هغه لومړی په کرولي کې او وروسته په برکنل کې په هوټلونو کې اوسېدلی، او بیا یې په یوه موټر مینځلو ځای کې کار پیل کړی و.
د هغه مېرمن، حبیبه حیدري، چې امیندواره ده، ویلي چې نوموړی څو ورځې مخکې له کوره وتلی و او بېرته نه و راستون شوی. د اړیکو د ناکامو هڅو وروسته، موضوع چارواکو ته راپور شوه او وروسته د هغه د وژل کېدو خبر تایید شو.
بریتانوۍ پولیسو ویلي چې د دې قتل انګېزه لا هم روښانه نه ده او پلټنې دوام لري.
دا پېښه یوازې یوه جنایي قضیه نه بلل کېږي، بلکې د هغو افغانانو د ژوند او امنیت په اړه پراخې اندېښنې راولاړوي چې د لوېدیځو ځواکونو له همکارۍ وروسته اروپا ته لېږدول شوي دي.
دغو کسانو ته انتقال، سره له دې چې له جګړې څخه د وتلو معنا لري، خو ډېری وخت له رواني فشارونو، اقتصادي ستونزو، او ټولنیزو ننګونو سره مل وي.
د ماموزي وژل کېدل دا پوښتنه بیا راپورته کوي چې ایا د جګړې له ډګره اروپا ته رسېدل رښتیا هم د خطر پای دی، که نه خطرونه یوازې بڼه بدلوي.
