د ایران د بهرنیو چارو وزیر عباس عراقچي ویلي چې د تهران او واشنګټن ترمنځ احتمالي توافق «هیڅکله دومره نهايي کېدو ته نږدې نه و».
عراقچي په خپلو تازه څرګندونو کې د مذاکراتو د بهیر په اړه خوشبیني څرګنده کړې او له رسنیو او شنونکو یې غوښتي چې د توافق له رسمي اعلان مخکې د هغه د جزئیاتو په اړه له اټکلونو ډډه وکړي.
هغه ټینګار کړی چې خبرې اترې لا هم روانې دي او د مذاکراتو د پایلو په اړه وروستۍ ارزونه باید د ډیپلوماټیک بهیر له بشپړېدو وروسته وشي.
د ایران د بهرنیو چارو وزیر زیاته کړې چې د احتمالي توافق جزئیات تر اوسه په رسمي ډول نه دي خپاره شوي او د دواړو لورو ترمنځ سلا مشورې دوام لري.
هممهاله، د امریکا ولسمشر ډونالډ ټرمپ د عراقچي خپور شوی پیغام په خپلې ټولنیزې شبکې کې بیا خپور کړی دی.
دغه اقدام په نړیوالو رسنیو کې پراخ انعکاس موندلی او د مذاکراتو د پرمختګ په اړه یې اټکلونه زیات کړي دي.
په وروستیو اونیو کې یو شمېر ایراني رسنیو د تهران او واشنګټن ترمنځ د احتمالي توافق د چوکاټ په اړه راپورونه خپاره کړي دي.
د دغو راپورونو له مخې، امریکا ښایي په ځینو مواردو کې له خپلو پخوانیو سختو دریځونو شاتګ کړی وي، خو نه تهران او نه هم واشنګټن دغه راپورونه په رسمي ډول تأیید کړي دي.
د عراقچي څرګندونې داسې مهال مطرح کېږي چې په وروستیو میاشتو کې د ایران او امریکا ترمنځ د نوي توافق د ترلاسه کولو لپاره ډیپلوماټیکې هڅې چټکې شوې دي.
د سیمې یو شمېر هېوادونو هم په وار وار د اختلافاتو د حل لپاره د خبرو اترو او سیاسي تفاهم پر اړتیا ټینګار کړی دی.
د دې تحول اهمیت په دې کې دی چې که دواړه لوري رښتیا هم توافق ته نږدې شوي وي، نو دا به نه یوازې د ایران او امریکا اړیکې اغېزمنې کړي، بلکې د منځني ختیځ امنیتي وضعیت، د انرژۍ نړیوال بازارونه او د سیمې سیاسي معادلې به هم تر خپل اغېز لاندې راولي.
