جفري بارتوس، د ملګرو ملتونو امنیت شورا غونډه کې د امریکا استازي، طالبان د ترهګرۍ ضد نړیوالو ژمنو په نه عملي کولو تورن کړي دي.
نوموړي په خپلې وینا کې وویل چې طالبانو د امریکايي وګړو د نیولو، د ترهګرو ډلو د پناه ورکولو او د ترهګرۍ پر ضد د تعهداتو د نه پلي کولو له لارې خپلو نړیوالو مسؤلیتونو ته ژمنتیا نه ده ښودلې.
بارتوس ټینګار وکړ چې له طالبانو سره د اړیکو هر ډول عادي کېدل به د دې ډلې د چلند له بدلون او د دوحې د بهیر له عملي پرمختګ سره تړلي وي.
هغه وویل نړیواله ټولنه نه شي کولای چې له څرګندو بدلونونو او عملي اقداماتو پرته له طالبانو سره د اړیکو د پراخولو یا عادي کولو لاره خپله کړي.
د امریکا د استازي څرګندونې داسې مهال مطرح کېږي چې د طالبانو د رسمیت پېژندنې او له دې ډلې سره د نړیوال تعامل موضوع لا هم د افغانستان اړوند نړیوالو بحثونو له مهمو موضوعاتو څخه ګڼل کېږي.
طالبانو تر دې وړاندې د ترهګرو ډلو د ملاتړ ادعاوې رد کړې او ویلي یې دي چې د افغانستان خاوره به د نورو هېوادونو پر ضد نه کارول کېږي.
خو امریکا او یو شمېر لوېدیځ هېوادونه لا هم په افغانستان کې د وسله والو ډلو د فعالیتونو او د طالبانو د امنیتي ژمنو په اړه اندېښنې لري.
تر اوسه طالبانو د امریکا د استازي دغو تازه څرګندونو ته رسمي غبرګون نه دی ښودلی.
د دې موضوع مهم اړخ دا دی چې واشنګټن یو ځل بیا روښانه کړې چې د طالبانو د نړیوال مشروعیت او رسمیت پېژندنې لاره د امنیتي، سیاسي او بشري ژمنو له عملي کېدو سره تړلې ده؛ هغه موضوع چې لا هم د کابل او نړیوالې ټولنې ترمنځ د اختلاف اصلي ټکی ګڼل کېږي.
