د امریکا ولسمشر ډونالډ ټرمپ او د چین د بهرنیو چارو وزارت په جلا جلا دریځونو کې له ایران او اسرائیل غوښتي چې د یو بل پر ضد بریدونه ودروي او د روانې شخړې د پراخېدو مخه ونیسي.
ټرمپ په خپلې ټولنیزې شبکې «ټروت سوشیل» کې لیکلي چې دواړه لوري باید ژر تر ژره پر یو بل بریدونه پای ته ورسوي او د وضعیت د لا خرابېدو مخه ونیسي.
د امریکا ولسمشر خبرداری ورکړی چې د پوځي عملیاتو دوام کولی شي سیمه له لا خطرناکو پایلو سره مخ کړي او د دواړو خواوو له مشرانو یې د زغم او احتیاط غوښتنه کړې ده.
په ورته وخت کې د چین د بهرنیو چارو وزارت هم د منځني ختیځ د امنیتي وضعیت په اړه اندېښنه څرګنده کړې او له تهران او تلابیب څخه یې غوښتي چې اوربند ته غاړه کېږدي او د شخړې د پراخېدو مخه ونیسي.
بیجینګ ویلي چې د جګړې دوام نه یوازې سیمهییز ثبات له ګواښ سره مخ کوي، بلکې کولی شي پراخ امنیتي، سیاسي او اقتصادي اغېزې هم ولري.
دغه غوښتنې په داسې حال کې مطرح کېږي چې د ایران او اسرائیل ترمنځ متقابل بریدونه لا هم روان دي او د دواړو خواوو د تازه پوځي عملیاتو راپورونه خپرېږي.
په وروستیو ورځو کې د توغندیزو او هوايي بریدونو زیاتېدو نړیواله اندېښنه راپارولې او ګڼ هېوادونه وېره لري چې وضعیت ښايي په یوه پراخه سیمهییزه جګړه بدل شي.
شنونکي وایي د امریکا او چین هممهاله دریځ ښيي چې دواړه نړیوال ځواکونه، سره له دې چې په ګڼو نړیوالو موضوعاتو کې اختلافات لري، د منځني ختیځ د بحران د لا پراخېدو د مخنیوي په اړه ګډه اندېښنه لري.
تر اوسه ایران او اسرائیل د واشنګټن او بیجینګ دغو غوښتنو ته نوی رسمي غبرګون نه دی ښودلی.
