ایراني چارواکو ویلي چې روسیې د هغو زیربناوو په بیارغونه کې د همکارۍ چمتووالی ښودلی چې د وروستیو جګړو او بریدونو له امله زیانمنې شوې دي؛ هغه اقدام چې د تهران او مسکو ترمنځ د اقتصادي او تخنیکي همکاریو د لا پراختیا نښه بلل کېږي.
د ایران د انرژۍ وزارت د نړیوالو چارو د مرکز رئیس محمدولي علاءالدیني ویلي چې د هېواد پر ځینو حیاتي تاسیساتو د اوښتو زیانونو له ارزونې وروسته، روسي چارواکو د بیارغونې په بهیر کې د مرستې وړاندیز کړی دی.
د هغه په وینا، د روسیې د انرژۍ وزارت مرستیال مارشاوین له ایراني چارواکو سره په خبرو کې ټینګار کړی چې مسکو د زیانمنو شویو تاسیساتو د رغونې، عصري کولو او د اړتیا وړ تجهیزاتو د برابرولو لپاره چمتو دی.
علاءالدیني ویلي چې روسي شرکتونه د انرژۍ، برېښنا او بنسټیزو پروژو په برخه کې پراخه تخنیکي تجربه لري او د هغوی ګډون کولای شي د زیانمنو شویو شبکو او تاسیساتو د بیا فعالولو بهیر چټک کړي.
هغه زیاته کړې چې د دواړو هېوادونو همکاري باید یوازې د بیارغونې تر پړاو پورې محدوده نه وي، بلکې د اوبو، برېښنا، انرژۍ او انجینري پروژو په برخو کې د اوږدمهالو همکاریو لپاره هم زمینه برابره کړي.
ایران او روسیې په وروستیو کلونو کې د انرژۍ، سوداګرۍ، ترانسپورټ، پانګونې او زیربنایي پروژو په برخو کې خپلې اړیکې پراخې کړې دي.
شنونکي باور لري چې د ایران د زیانمنو شویو تاسیساتو په بیارغونه کې د روسیې د ګډون اعلان د دواړو هېوادونو د ستراتیژیکو اړیکو د لا ژورتیا څرګندونه کوي.
دوی وایي د انرژۍ او برېښنا د شبکو بیارغونه د هر هېواد د اقتصادي فعالیتونو، صنعتي تولیداتو او عامه خدماتو د بېرته فعالېدو لپاره حیاتي ارزښت لري.
له همدې امله، د روسیې احتمالي ګډون نه یوازې د زیانمنو شویو تاسیساتو د رغولو لپاره مهم ګڼل کېږي، بلکې د ایران د انرژۍ او زیربنایي سکتور د راتلونکو پراختیايي پروګرامونو لپاره هم اغېزناک تمامېدلی شي.
کارپوهان په دې باور دي چې که دا همکاري عملي بڼه خپله کړي، نو د دواړو هېوادونو ترمنځ به اقتصادي او تخنیکي اړیکې لا پیاوړې شي او د سیمې په کچه به د هغوی ګډې پروژې هم پراخې شي.
