د افغانستان د ښځو د ولسي محکمې غړو د سویلي افریقا د سفر پر مهال له مدني بنسټونو، د بشري حقونو له فعالانو او د دغه هېواد له مخکښو شخصیتونو سره لیدنې کړې دي، څو د افغان ښځو لپاره نړیوال ملاتړ پیاوړی او د بشري حقونو د سرغړونو د عاملینو د حساب ورکولو هڅې پراخې کړي.
د روادارۍ سازمان، چې د دې سفر د تنظیم او همغږۍ مسؤلیت یې درلود، ویلي چې د دغو لیدنو اصلي موخه د خبرو اترو عملي اقداماتو ته اړول، د نړیوالو همکاریو پیاوړتیا او د افغانستان د ښځو د ځپلو پر ضد د نړیوال ائتلاف د جوړېدو لپاره د پراخې همغږۍ رامنځته کول دي.
د یاد پلاوي غړو د اپارتاید ضد مبارزینو، د پوهنتون استادانو، د سویلي افریقا د بشري حقونو د کمېسیون غړو، د بشري حقونو بنسټ، د انتقالي عدالت شبکې او د کیپټاون د مسلمانې ټولنې له استازو سره لیدنې او خبرې کړې دي.
د روادارۍ سازمان د معلوماتو له مخې، په دغو ټولو غونډو کې د همکاریو پر دوام، د تجربو پر تبادلې او د افغانستان د ښځو او خلکو پر ملاتړ ټینګار شوی دی.
ګډونوالو همدارنګه د پوهنتونونو او بشري حقونو د شبکو ترمنځ د اړیکو پراخولو، د ګډو غونډو د جوړولو او په نړیوالو فورمونو کې د عدالت غوښتنې د پیاوړتیا په ګډون د عملي همکاریو لارې چارې ارزولي دي.
د دې سفر تنظیموونکي وایي چې د اپارتاید پر ضد د سویلي افریقا تاریخي مبارزه او د نړیوال عدالت په بهیرونو کې د دغه هېواد تجربه کولای شي د افغان ښځو د حقونو د ملاتړ لپاره مهم رول ولوبوي.
د افغانستان د ښځو ولسي محکمه یو سمبولیک او غیررسمي بنسټ دی چې د بشري حقونو د فعالانو په نوښت او د دایمي ولسي محکمې په ملاتړ رامنځته شوی دی.
د دې بنسټ موخه د ښځو پر وړاندې د حقونو د سرغړونو مستندسازي، د نړیوالې ټولنې پام رااړول او د طالبانو پر وړاندې د حساب ورکولو د فشار زیاتول بلل شوي دي.
