د افغانستان د ازادۍ جبهې ویلي چې د شنبې ورځې د سهار په لومړیو ساعتونو کې یې د بدخشان ولایت د بهارک ولسوالۍ د «شرکت» سیمې ته نږدې د طالبانو پر یوې پوځي قطعې راکټي برید ترسره کړی دی.
دې جبهې د یکشنبې په ورځ په خپره کړې خبرپاڼه کې ویلي چې برید د سهار شاوخوا درې بجې ترسره شوی او له هغه وروسته د جبهې د ځواکونو او طالبانو ترمنځ نښته هم شوې ده.
د خبرپاڼې له مخې، د طالبانو له مخکې ټاکل شوي پوځي موقعیتونه په نښه شوي، خو جبهې ویلي چې د طالبانو د احتمالي مرګژوبلې په اړه کره معلومات نه لري.
په همدې حال کې، ځايي سرچینو تلویزیون نیمروز ته ویلي چې په سیمه کې یې د لږ تر لږه دوو راکټونو د توغولو غږونه اورېدلي دي.
طالبانو تر اوسه د دغې ادعا په اړه څه نه دي ویلي او د پېښې جزئیات یې هم نه دي خپاره کړي.
د افغانستان د ازادۍ جبهې تر دې وړاندې هم په بدخشان ولایت کې د خپلو پسرلنیو عملیاتو د پیل خبر ورکړی و او ادعا یې کړې وه چې طالبانو په ځینو سیمو کې خپلې پوستې پرېښې دي.
بدخشان په وروستیو میاشتو کې د هغو ولایتونو له ډلې څخه دی چې د طالبانو د مخالفو وسلهوالو ډلو د فعالیتونو راپورونه ترې خپاره شوي دي.
ځینو نړیوالو بنسټونو هم د افغانستان په شمال کې د وسلهوالو تحرکاتو د زیاتېدو په اړه اندېښنه څرګنده کړې او خبرداری یې ورکړی چې امنیتي وضعیت کېدای شي لا پېچلی شي.
د یادونې وړ ده چې د ازادۍ جبهې ادعاوې تر اوسه د خپلواکو سرچینو او یا هم د طالبانو له لوري نه دي تأیید شوې.
