د افغانستان رسنيو راپور ورکړی چې د افغانستان پخواني ولسمشر اشرف غني متحده عربي امارات پرېښي او لبنان ته تللی دی.
دا راپورونه وروسته له هغې خپاره شول چې ښاغلي غني په خپل وروستي اختريز پيغام کې وويل چې په تېرو مياشتو کې د خبرو او رسنيز حضور امکان نه درلود او غږ يې «خاموش» ساتل شوی و.
هغه د اماراتو له نوم اخيستو پرته، په غير مستقيم ډول په خپل پخواني استوګنځي کې د سياسي او رسنيزو محدوديتونو انتقاد کړی و.
د راپورونو له مخې، د اشرف غني مېرمن رولا غني د لبنان تبعه ده او خپله غني هم پخوا د يوې مودې لپاره په دغه هېواد کې زده کړې کړې وې؛ هغه موضوع چې بيروت ته د هغه د لېږد اټکلونه پياوړي کړي دي.
اشرف غني په خپل وروستي پيغام کې د طالبانو له بيا واکمنېدو وروسته د افغانستان وضعيت «د مرګ او ژوند ترمنځ دوه لارې» بللی او خبرداری يې ورکړی و چې هېواد د سقوط کندې ته نږدې شوی دی.
هغه همدارنګه د ملي خبرو اترو، د سياسي انحصار د پای او د حکومتولۍ د طريقې د بيا ارزونې غوښتنه کړې وه.
خو تر اوسه څرګنده نه ده چې اشرف غني به په لبنان کې کوم ډول سياسي فعاليت تعقيب کړي او ايا غواړي د افغانستان په سياست کې يو منظم او فعال حضور ولري که نه.
ځينې شنونکي باور لري چې د هغه وروستی انتقال او توندې سياسي څرګندونې ښايي د افغانستان په تحولاتو کې د خپل سياسي رول د بيا تعريف هڅه وي.
خو د کارپوهانو په باور، سياست ته د اشرف غني احتمالي بېرته راستنېدل به له جدي کورنيو او نړيوالو ننګونو سره مخ وي؛ په ځانګړي ډول په داسې حال کې چې د افغانستان د عامه افکارو يوه لويه برخه لا هم په ۲۰۲۱ کال کې د جمهوري نظام سقوط او د هغه وتل له کابله نه دي هېر کړي.
