په بدخشان ولایت کې ځايي سرچینو ویلي چې د سرو زرو د کانونو د کنټرول پر سر د طالبانو داخلي شخړې نوې مرحلې ته داخلې شوې او دې ډلې د پراخو امنیتي عملیاتو په دوام د خپلو بانفوذه قوماندانانو اړوند یو شمېر کسان نیولي دي.
د سرچینو د معلوماتو له مخې، خالد چې د هلمند لپاره د طالبانو د والي امانالدین منصور وراره دی، موسی کاکه چې د زابل د طالبانو د مرستیال والي جمعهخان فاتح له نږدې قوماندانانو څخه ګڼل کېږي، او د فراه لپاره د طالبانو د والي مولوي حافظ ورورخسر هم د نیول شویو کسانو په ډله کې شامل دي.
سرچینو همدارنګه ویلي چې طالبانو د امانالدین منصور اړوند د سرو زرو د پروسس کارخونې ویجاړې کړې دي او ځینې دغه مرکزونه د چینایي وګړو په همکارۍ فعال وو.
د سرچینو په وینا، درې چینایي وګړي هم مخکې د معدني فعالیت د جواز نه لرلو له امله نیول شوي وو.
د طالبانو سرچینې وایي، د شکي، نسي او شغنان ولسوالیو د سرو زرو د کانونو پر سر اختلافات ډېر زیات شوي او د طالبانو مشرتابه د سیمهییزو قوماندانانو د کنټرول لپاره شاوخوا زر کسیزه ځانګړې قطعه بدخشان ته استولې ده.
دغه عملیات د بدخشان لپاره د طالبانو د والي اسماعیل غزنوي تر څارنې لاندې روان دي.
سرچینو خبرداری ورکړی چې د طالبانو د استول شویو ځواکونو او د سیمهییزو قوماندانانو د اړوندو کسانو ترمنځ د خونړۍ نښتې احتمال شته.
همدارنګه راپور ورکړل شوی چې د جمعه فاتح ورور عبدالفتاح د عملیاتو له پیل وروسته له لسګونو کسانو سره تښتېدلی دی.
د بدخشان لپاره د طالبانو والي په دې وروستیو کې د کانونو سیمو اوسېدونکو ته خبرداری ورکړی و چې پرته له رسمي جواز څخه د سرو زرو استخراج او پروسس اجازه نه لري او ویلي یې و چې شاوخوا دوه زره «غیرقانوني» کانونه درول شوي دي.
خو ځايي سرچینې وایي چې د نیونو او د معدني تجهیزاتو د ویجاړولو عملیات لا هم دوام لري او تر اوسه لږ تر لږه ۱۵ کسان نیول شوي دي.
دغه تحولات ښيي چې د افغانستان کانونه، په ځانګړي ډول د بدخشان د سرو زرو کانونه، د طالبانو د داخلي سیالیو له تر ټولو حساسو محورونو څخه ګرځېدلي دي.
شنونکي وایي، طالبان هڅه کوي د کانونو استخراج تر متمرکز کنټرول لاندې راولي، خو سیمهییز قوماندانان او د بېلابېلو جناحونو اړوند شبکې د خپلو مالي سرچینو او نفوذ د ساتلو لپاره سخت رقابت کوي.
په دې قضیه کې د طالبانو د بانفوذه څېرو او چینایي وګړو د نومونو مطرح کېدل د بحران اقتصادي او سیاسي اړخونه لا پېچلي کړي او ښيي چې د طبیعي سرچینو پر سر شخړه اوس د طالبانو له مهمو داخلي ننګونو څخه ګرځېدلې ده.
