د افغانستان د هوا پېژندنې ادارې اعلان کړی چې د دوشنبې په ورځ د ثور په ۲۱مه، د هېواد په ۱۸ ولایتونو کې د سختو بارانونو، تالندې، تندو بادونو او سېلابونو د راوتلو احتمال شته.
د دغې ادارې په وینا، د افغانستان په بېلابېلو سیمو کې د باران اندازه له ۱۰ تر ۳۰ میلیمټرو پورې اټکل شوې ده.
د خبرتیا له مخې، په بدخشان، تخار، کندوز، سمنګان، بغلان، پنجشېر، پروان، کاپیسا، لغمان، ننګرهار، کونړ، نورستان، کابل، میدان وردګ، بامیان، لوګر، پکتیا او خوست ولایتونو کې د بارانونو او سېلابونو احتمال شته.
د هوا پېژندنې ادارې همداراز خبرداری ورکړی چې په ختیځو، سوېل ختیځو، سوېلي، لوېدیځو او مرکزي ولایتونو کې د دوړو او خاورې سره د سختو بادونو د لګېدو امکان هم شته.
د دغو بادونو چټکتیا له ۵۰ تر ۹۰ کیلومترو په ساعت کې اټکل شوې ده.
دغه خبرداری داسې مهال خپرېږي چې په وروستیو ورځو کې د افغانستان په بېلابېلو برخو کې سخت بارانونه او طبیعي پېښې زیاتې شوې دي.
تر دې وړاندې د طالبانو ځايي چارواکو ویلي وو چې په کاپیسا کې لږ تر لږه څلور تنه او په ننګرهار کې دوه تنه د سختو بارانونو، تالندې او د کورونو د چتونو د نړېدو له امله مړه شوي دي.
د پېښو پر وړاندې د مبارزې ادارې د شمېرو له مخې، په وروستیو میاشتو کې په افغانستان کې لږ تر لږه ۲۱۴ کسان د سېلابونو، ځمکې ښوېدنې، سختو بارانونو او نورو طبیعي پېښو له امله مړه شوي دي.
دغو پېښو زرګونه جریبه کرنیزه ځمکه، سلګونه کورونه او لسګونه دوکانونه هم ویجاړ کړي دي.
کارپوهان خبرداری ورکوي چې اقلیمي بدلونونه، کمزورې زېربناوې او د بحران د مدیریت د اغېزمنو سیستمونو نشتوالی افغانستان د طبیعي پېښو پر وړاندې لا ډېر زیانمن کړی دی.
