نوې «حقیق» راډیو په رسمي ډول د خپلو خپرونو له پیل سره په کابل کې خپل رسنیز فعالیت پيل کړی دی.
د دې راډیو مسوول عبید نجرابي وایي، «حقیق» به د خبرونو ترڅنګ ټولنیزې، فرهنګي، ښوونیزې، معلوماتي او عامه پوهاوي خپرونې هم وړاندې کوي.
د نجرابي په وینا، د دې راډیو موخه د دقیقو، باوري او پر وخت معلوماتو وړاندې کول او د ټولنې د اړتیاوو او مهمو موضوعاتو په اړه د مسلکي او ګټور منځپانګې تولید دی.
د «حقیق» راډیو مسوولان وایي، دغه رسنۍ به د مسلکي ژورنالیزم اصولو ته په پام، د خلکو غږ ته انعکاس ورکولو او ښوونې، کلتور او ټولنیز پوهاوي ته د پاملرنې له لارې هڅه وکړي چې د کابل د رسنیز چاپېریال په پیاوړتیا کې ونډه واخلي.
د دې راډیو د فعالیت پیل په داسې وخت کې کېږي چې غږیزې رسنۍ لا هم په افغانستان کې د خبرونو، زدهکړو او ټولنیزو خپرونو لپاره د خلکو د لاسرسي له مهمو وسیلو څخه ګڼل کېږي.
