د کابل ښاروالۍ اعلان کړی چې د دې ښار د پنځمې ناحیې اړوند د ریګریشن په سیمه کې د ۶۰ جریبه ځمکې د بېرته نیولو بهیر پیل شوی دی.
د کابل ښاروالۍ په خبرپاڼه کې ویل شوي چې د غصب شوو ځمکو د مخنیوي او بېرته ترلاسه کولو د تخنیکي کمېسیون له پرېکړې وروسته، په دې ځمکه کې د سیمې د پاکولو او د ناقانونه جوړو شوو تاسیساتو د لرې کولو بهیر پیل شوی دی.
د کابل ښاروالۍ په وینا، د دې بهیر له پیل مخکې، د ځمکې اوسېدونکي او اړوند کسان په تېرو یو کال کې څو ځله د سیمې د تخلیې له پرېکړې خبر شوي وو.
دغه اداره وايي، د علماوو شورا له خوا ټاکل شوې درې میاشتنی مهلت هم پای ته رسېدلی او د دغه مهلت له پای ته رسېدو شپږ میاشتې تېرې شوې دي.
کابل ښاروالۍ زیاتوي چې د سیمې د پاکولو عملیات لا هم دوام لري او له بشپړېدو وروسته به دغه ځمکه د ښاري او پراختیايي پروګرامونو د پلي کولو لپاره چمتو شي.
د کابل ښاروالۍ ټینګار کړی چې د دولتي ځمکو د غصب د مخنیوي، د غصب شوو ملکیتونو د بېرته ترلاسه کولو او د ښاري ځمکو د قانوني او معیاري استفادې لپاره به نور اقدامات هم ترسره کړي.
دغې ادارې ویلي چې یاده ځمکه په تېرو کلونو کې د یو شمېر کسانو له خوا په «بېلابېلو پلمو» نیول شوې وه.
