د ملګرو ملتونو سرمنشي انتونیو ګوترش له طالبانو غوښتي چې په ملګرو ملتونو کې د افغان ښځو پر کار لګېدلی بندیز سمدستي لغوه کړي.
د ګوترش ویاند ویلي، د طالبانو له لوري پر ښځو لګېدلي محدودیتونه له نړیوالو قوانینو سره په ټکر کې دي او د بشري مرستو د رسولو لپاره د ملګرو ملتونو وړتیا کموي.
ګوترش همداراز پر ښځو او نجونو د ټولو محدودیتونو د لرې کولو او د افغانستان په ټولنه کې د هغوی د برابر ګډون پر اړتیا ټینګار کړی دی.
د نیمروز په ارزونه، د ملګرو ملتونو د سرمنشي دا غوښتنه په داسې مهال مطرح کېږي چې په افغانستان کې د ښځو د کار او زدهکړو پر وړاندې محدودیتونه لا هم د نړیوالې ټولنې له مهمو اندېښنو څخه دي. په ملګرو ملتونو کې د افغان ښځینه کارکوونکو د فعالیت محدودول نه یوازې د هغوی پر کاري حق اغېز کوي، بلکې د بشري مرستو د رسولو پر بهیر هم مستقیمه اغېزه لرلی شي؛ په ځانګړي ډول په هغو برخو کې چې له ښځو او کورنیو سره د مرستو لپاره د ښځینه کارکوونکو حضور اړین وي.
