د استرالیا صدراعظم انتوني البانیزي اعلان کړی چې د دې هېواد په تاریخ کې د لومړي ځل لپاره یوه ښځه د پوځ د عمومي قومندانې په توګه ټاکل شوې ده.
د دفاع وزارت په وینا، جنرال سوزان کویل به د جولای له میاشتې څخه خپله دنده پیل کړي.
د استرالیا د دفاع وزیر ریچارد مالز دا ټاکنه یوه تاریخي شېبه بللې ده.
کویل چې اوس مهال د پوځ د ګډو وړتیاوو مشري کوي، د جنرال سایمون سټوارت ځای نیسي.
هغه ۵۵ کلنه ده او له ۱۹۸۷ کال راهیسې په پوځ کې دنده لري او پراخه تجربه لري، چې په کې میداني عملیات، ستراتیژیک پلان جوړونه او سایبري جګړه شامل دي.
هغې په افغانستان او منځني ختیځ کې په نړیوالو ماموریتونو کې هم برخه اخیستې ده.
دا ټاکنه د استرالیا په پوځ کې یو مهم بدلون بلل کېږي او ښيي چې ښځې ورو ورو د نظامي رهبرۍ لوړو کچو ته رسېږي.
