په انقره کې د امریکا سفیر او د سوریې او عراق لپاره د دغه هېواد ځانګړي استازي تام باراک ویلي چې هغه معلومات ناسم وو چې اسرائیلو د سوریې پر ابوالظهور هوايي اډې د برید پر مهال پرې تکیه کړې وه.
باراک ویلي چې د اسرائیلو د برید کره دلیل ورته معلوم نه دی، خو تلآویو له برید مخکې داسې معلومات ترلاسه کړي وو چې ښودله ترکیه ښايي ابوالظهور هوايي اډې ته پوځي تجهیزات یا ځواکونه انتقالوي.
د هغه په وینا، اسرائیلو دغه معلومات له واشنګټن سره هم شریک کړي وو.
په انقره کې د امریکا سفیر د دغو معلوماتو د سرچینې یا د ارزونې د څرنګوالي په اړه نور جزیات نه دي ورکړي، خو ټینګار یې کړی چې ابوالظهور ته د ترکیې د ځواکونو یا پوځي تجهیزاتو د انتقال په اړه شوې ارزونه سمه نه وه.
د ابوالظهور هوايي اډه د سوریې له مهمو پوځي مرکزونو څخه ده او په تېرو کلونو کې د سوریې د جګړې پر مهال د بېلابېلو ډلو له خوا کارول شوې ده.
د باراک څرګندونې په داسې وخت کې مطرح کېږي چې په سوریه کې د ترکیې امنیتي او پوځي رول لا هم د امریکا او اسرائیلو د پام وړ موضوع ده او د سوریې په پوځي اډو کې د انقرې هر ډول حضور کولای شي د سیمې پر امنیتي معادلو اغېز وکړي.
تر اوسه اسرائیلو او ترکیې د باراک د دغو څرګندونو په اړه رسمي غبرګون نه دی ښودلی.
