د ایران د پیام نور پوهنتون رئیس محمدهادي امین ناجي وایي، په افغانستان کې د ښځو او نجونو له زدهکړو څخه د طالبانو د مخنیوي وروسته، په ایران کې د افغانانو د لوړو زدهکړو غوښتنه زیاته شوې ده.
امین ناجي د دوشنبې په ورځ، د زمري پر ۱۹مه، د خراسان رضوي ولایت تایباد ښار ته د خپل سفر پر مهال، چې له افغانستان سره پولې ته نږدې دی، وویل چې د دوغارون په پوله کې د پیام نور پوهنتون د نړیوال واحد د جوړولو لپاره اړین بنسټونه برابر شوي او دغه واحد به ډېر ژر خپل فعالیت پیل کړي.
د پیام نور پوهنتون رئیس ویلي: «په افغانستان کې د طالبانو له واکمنېدو او د دغه هېواد د ښځو د تحصیل له منع کېدو وروسته، د هغوی لېوالتیا د ایران د پیام نور پوهنتونونو د زدهکړو لپاره زیاته شوې ده.»
هغه له افغانستان، په ځانګړي ډول له هرات ولایت سره د ایران نږدېوالی د افغان محصلانو د جذب لپاره فرصت وباله او ویې ویل چې د دغه واحد پرانیستل کولای شي افغان نجونو او هلکانو ته د زدهکړو د دوام زمینه برابره او د دواړو هېوادونو ترمنځ تعلیمي اړیکې پراخې کړي.
د پیام نور پوهنتون د رئیس په وینا، دوغارون د ایران په ختیځ کې له مهمو اقتصادي پولو څخه دی او هره ورځ له درېزرو او ۵۰۰ څخه زیات ایراني او بهرني مسافر له دې لارې تګ راتګ کوي.
پیام نور په ایران کې یو نیمهدولتي او نیمهحضوري پوهنتون دی چې په ۱۳۶۷ لمریز کال کې جوړ شوی دی. د ایراني چارواکو د معلوماتو له مخې، د تایباد په پیام نور پوهنتون کې له یو زرو او ۴۰۰ څخه زیاتې نجونې او هلکان زدهکړې کوي.
ایراني چارواکو همداراز ویلي چې په ایران کې لسګونه زره بهرني محصلان زدهکړې کوي او شاوخوا ۹۰ سلنه یې له افغانستان او عراق څخه دي.
طالبانو په ۲۰۲۱ کال کې له بیا واکمنېدو وروسته، له شپږم ټولګي پورته د نجونو زدهکړې ودرولې او ښځې او نجونې یې له پوهنتوني زدهکړو هم منع کړې.
دغه محدودیتونه د ملګرو ملتونو او د بېلابېلو هېوادونو له پرلهپسې غوښتنو سره سره لا هم دوام لري، څو طالبان د نجونو لپاره ښوونځي او د ښځو او نجونو لپاره پوهنتونونه بېرته پرانیزي.
په دوغارون کې د پیام نور د نړیوال واحد د فعالیت پیل په داسې شرایطو کې کولای شي د یو شمېر افغان محصلانو، په ځانګړي ډول هغو نجونو ته چې په افغانستان کې له زدهکړو محرومې شوې دي، په ایران کې د تحصیل د دوام زمینه اسانه کړي.
