د طالبانو د هرات د پولیسو قوماندانۍ ویاند سید مسعود حسيني وایي، امنیتي ځواکونو په هرات ښار کې یوه ښځه د یو نیم کلن ماشوم د وژنې په تور نیولې ده.
د حسيني په وینا، نیول شوې ښځې د یوه کورنۍ په کور کې د خدمتکارې په توګه کار کاوه او له دوو نورو ښځو سره یوځای یې په دغه کور کې دندې ترسره کولې.
د هرات د طالبانو د پولیسو ویاند ادعا کوي چې د لومړنیو څېړنو له مخې، د دغې ښځې او د هغې د دوو همکارانو ترمنځ د شخصي اختلافاتو او دښمنۍ له امله، نوموړې تورنه ده چې د کورنۍ یو نیم کلن ماشوم یې د ودانۍ له پنځم پوړ څخه لاندې غورځولی دی.
د طالبانو د پولیسو په وینا، ماشوم د پېښې په ځای کې ژوند له لاسه ورکړی دی.
حسيني وایي، تورنه ښځه د امنیتي ځواکونو له خوا نیول شوې او د لومړنیو تحقیقاتو پر مهال یې د پېښې د ترسره کولو اعتراف کړی دی.
د پېښې دوسیه د نورو تحقیقاتو او قانوني پړاوونو د بشپړولو لپاره اړوندو مراجعو ته سپارل شوې ده.
تر اوسه د نیول شوې ښځې او د ماشوم د کورنۍ د هویت په اړه نور جزئیات نه دي خپاره شوي.
