ځایي سرچینې وایي، د انسان د قاچاق منظمې شبکې لا هم د پاکستان د بلوچستان ایالت له غرنیو او دښتنیزو لارو څخه ایران ته د افغان کډوالو د ناقانونه لېږد لپاره کار اخلي. د دغو سرچینو په وینا، سره له دې چې امنیتي تدابیر سخت شوي، یادې لارې لا هم فعالې پاتې دي.
د سرچینو د معلوماتو له مخې، قاچاقبران افغانان د افغانستان له نیمروز ولایت څخه د بلوچستان د چاغي ولسوالۍ نوکندي سیمې ته رسوي او وروسته یې د واشک ولسوالۍ د ماشکیل له لارې ایران ته اوړي. سرچینې ادعا کوي چې دغه شبکې د پولې دواړو غاړو ته د ځینو سیمهییزو کسانو په همکارۍ هڅه کوي د لېږد لارې د سرحدي ځواکونو له څار څخه لرې وساتي.
د ترلاسه شویو معلوماتو له مخې، له نوکندي څخه ایران ته د هر کډوال د لېږد لپاره شاوخوا ۴۰ زره پاکستانۍ روپۍ اخیستل کېږي او یو شمېر کډوال له ایران وروسته ترکیې او اروپايي هېوادونو ته خپل سفر ته دوام ورکوي.
سرچینو همدارنګه ویلي چې د ګوادر د جیواني په کنتاني ساحلي سیمه کې بله لاره هم شته، چې له هغې څخه کډوال د وړو کښتیو په وسیله په ناقانونه توګه ایران ته لېږدول کېږي. د دوی په وینا، د دې لارې لګښت شاوخوا ۱۵ زره پاکستانۍ روپۍ دی، خو په وروستیو میاشتو کې د امنیتي تدابیرو د زیاتېدو له امله ترې استفاده کمه شوې ده.
د راپور له مخې، د چمن په دروازه کې له محدودیتونو سره سره د انسان قاچاق لا هم دوام لري او کوټې ښار ته د کډوالو د لېږد لګښت د پخوا په پرتله راټیټ شوی دی.
همدارنګه راپور ورکړل شوی چې د روان کال د مې میاشتې راهیسې نږدې ۵۸۰ افغان وګړي د ایران او اروپا پر لور د ناقانونه سفر د هڅې پر مهال په بلوچستان کې نیول شوي او لږ تر لږه ۱۱ افغانان په دوو جلا پېښو کې خپل ژوند له لاسه ورکړی دی.
ملګرو ملتونو تر دې مخکې خبرداری ورکړی و چې په افغانستان کې روان بشري او اقتصادي بحران، د کډوالو جبري ستنول او د بشري مرستو کمېدل د افغانانو لپاره د انسان قاچاق خطر زیاتوي.
تلویزیون نیمروز نه شي کولای د ځایي سرچینو هغه ادعاوې چې د انسان د قاچاق د شبکو د فعالیت د څرنګوالي په اړه یې مطرح کړې دي، په خپلواکه توګه تأیید کړي.
