د روسیې فدرالي امنیتي خدمت (افاسبي) د ټیلیګرام بنسټګر پاول دوروف د «ترهګریزو فعالیتونو د اسانتیا برابرولو» په تور تورن کړی او اعلان یې کړی چې نوموړی یې د نړیوال تعقیب په نوملړ کې شامل کړی دی. دا اقدام په داسې مهال ترسره کېږي چې روسیه د انټرنېټ محدودیتونه زیاتوي او د «مکس» په نوم د کورني پیغامرسوونکي کارول هم پراخوي.
د اسوشیټېډ پرېس او رویټرز د راپورونو له مخې، افاسبي ادعا کړې چې د ټیلیګرام ادارې ګڼ هغه کانالونه، ډلې او روباټونه نه دي تړلي چې د دې ادارې په وینا، د اوکراین د استخباراتي ادارو او «ترهګرو او افراطي ډلو» له خوا د تخریبي عملیاتو، ترهګریزو بریدونو او سایبري درغلیو د همغږۍ لپاره کارېدل.
افاسبي همدارنګه ادعا کړې چې د دغو محتواوو فعالیت د «ګڼو انساني تلفاتو» لامل شوی، خو د خپلو ادعاوو د ملاتړ لپاره یې د مشخصو پېښو یا قضیو جزییات نه دي خپاره کړي.
د خبر تر خپرېدو پورې نه پاول دوروف او نه هم د ټیلیګرام شرکت د دغو تورونو په اړه رسمي غبرګون ښودلی دی. دوروف تر دې وړاندې ویلي وو چې روسي چارواکي د ټیلیګرام د محدودولو لپاره پر ده دوسیې جوړوي او دغه اقدامات یې د شخصي محرمیت او د بیان ازادۍ د ځپلو هڅه بللې وه.
ټیلیګرام چې په ۲۰۱۳ کال کې جوړ شوی، وایي له یو میلیارد څخه ډېر کاروونکي لري او په روسیه او همدارنګه د روسیې او اوکراین د جګړې پر مهال د معلوماتو د خپرولو له مهمو پیغامرسوونکو څخه ګڼل کېږي.
په ورته وخت کې، روسیه د «مکس» په نوم د کورني پیغامرسوونکي کارول، چې د دولت ملاتړ لري، هڅوي. منتقدان خبرداری ورکوي چې دا پلاتفورم د کاروونکو د پراخې څارنې وسیله کېدای شي، ځکه د سرتاسري کوډګذارۍ ملاتړ نه کوي او ویلي یې دي چې د روسي چارواکو د غوښتنې په صورت کې به د کاروونکو معلومات ورسره شریک کړي.
پاول دوروف د روسیې د دوسیې ترڅنګ په فرانسه کې هم له قضایي څېړنو سره مخ دی. فرانسوي چارواکي ارزوي چې آیا ټیلیګرام د جرمونو د مخنیوي او له قانون پلي کوونکو ادارو سره د همکارۍ په برخه کې کافي اقدامات کړي که نه. دوروف ټول هغه تورونه رد کړي چې د ده پر وړاندې مطرح شوي دي.
