په افغانستان کې د ملګرو ملتونو د مرستندویه پلاوي (یوناما) په خپل تازه درېمیاشتني راپور کې ویلي چې طالبان د خبریالانو په نیولو، د رسنیو د فعالیتونو په ځنډولو او پر خپرونو د محدودیتونو په لګولو سره د رسنیو ازادي لا هم محدودوي.
د سېشنبې په ورځ خپور شوي راپور له مخې، طالبانو د وري په ۲۲مه د خوست ولایت د لونګ راډیو روزنیز پروګرامونه د دې په دلیل ودرول چې د دوی په وینا، له تعلیمي نصاب سره سمون نه درلود.
یوناما همدارنګه ویلي چې د طالبانو د استخباراتو عمومي ریاست د غويي په ۱۷مه د بامیان راډیو د معتبرې نشراتي جواز د نه لرلو په تور د هغې د فعالیت د بندولو امر وکړ، خو دغه راډیو شپږ ورځې وروسته بېرته خپل نشرات پیل کړل.
راپور زیاتوي چې د لارې فردا ټلوېزیون هم د غبرګولي په ۲۱مه، د رهبرۍ له بدلون وروسته، د خپلو خپرونو د بیا پیل اجازه ترلاسه کړه.
د یوناما په وینا، لږ تر لږه اووه راډیوګانو په کندوز او غزني ولایتونو کې د مالي ژمنو او د جواز اړوندو نورو شرطونو د نه پوره کولو له امله خپل فعالیت ته دوام نه شو ورکولای.
راپور دا هم وایي چې طالبانو هڅه کړې د کابل د یوه رسنیز دفتر ګرځنده ټیلیفونونه، کمرې، کمپیوټرونه او اسناد ضبط کړي. همدارنګه په درېیو جلا پېښو کې درې خبریالان نیول شوي، چې د یوناما په وینا، دوه یې له څو ورځو وروسته خوشې شوي او درېیم خبریال هم له احضار او پوښتنو وروسته ازاد شوی دی.
یوناما د خپل راپور په بله برخه کې د دولتي ادارو د کارکوونکو لپاره د هوښیارو ټیلیفونونو د کارولو محدودیت ته هم اشاره کړې او ویلي یې دي چې د دې پرېکړې له عملي کېدو وروسته، ځینو سیمهییزو ادارو د کارکوونکو شخصي ټیلیفونونه ضبط یا مات کړي او د فیسبوک په ګډون یې په ټولنیزو شبکو کې خپل رسمي معلوماتي فعالیتونه درولي دي.
