د طالبانو د بدخشان د امنیې قوماندانۍ د ذبیحالله امیري، د دې ډلې د اطلاعاتو او کلتور رئیس، د وژل کېدو خبر تایید کړی دی.
طالبانو د سېشنبې په ورځ په خپره کړې خبرپاڼه کې ویلي چې ذبیحالله امیري د بهارک ولسوالۍ له خپل کور څخه د فیضآباد ښار پر لور د دفتر په لاره و، چې د بهارک ـ فیضآباد پر سړک د دوو موټرسایکل سپرو کسانو له برید سره مخ شو او ووژل شو.
د طالبانو د خبرپاڼې له مخې، د امیري ساتونکو په ځای کې یو بریدګر وژلی او د دوهم بریدګر د پېژندنې او نیولو لپاره عملیات لا هم روان دي.
د ترلاسه شویو معلوماتو له مخې، د ذبیحالله امیري موټرچلوونکی هم په دې برید کې ټپي شوی دی. له برید وروسته طالبانو سیمه کلابنده کړه او د نوموړي جسد د بهارک کلینیک ته ولېږدول شو.
تر دې دمه هېڅ شخص یا ډلې د دې برید مسؤلیت نه دی منلی.
دا پېښه په داسې حال کې رامنځته شوې چې په وروستیو ورځو کې، په ځانګړې توګه په بدخشان ولایت کې، د طالبانو پر ضد د وسلهوالو بریدونو راپورونه زیات شوي دي. خو تر اوسه داسې کوم رسمي شواهد نه دي خپاره شوي چې دا برید دې له کومې مشخصې وسلهوالې ډلې سره وتړي.
