د ونزوېلا حکومت د جرمونو له نړیوالې محکمې څخه د وتلو رسمي بهیر پیل کړی او وایي، د دې پرېکړې رسمي خبر یې د ملګرو ملتونو سرمنشي انتونیو ګوتېرش ته سپارلی دی.
د ونزوېلا د بهرنیو چارو وزیر فلیکس پلاسنسیا په یوه اعلامیه کې ویلي، کاراکاس خپله «قاطع او نه بدلېدونکې» پرېکړه د ملګرو ملتونو سازمان ته رسولې او غواړي د جرمونو له نړیوالې محکمې ووځي.
د ونزوېلا لوړپوړې چارواکې ډیلسي رودریګز د جرمونو نړیواله محکمه تورنه کړې چې د نړۍ د سوېل هېوادونو پر وړاندې جانبدارانه، سیاسي او تبعیضي چلند کوي. هغې ویلي، دغه بنسټ د ځینو هېوادونو په اړه یو شان معیار نه عملي کوي.
د شنونکو په باور، دغه اقدام ښايي د ونزوېلا او نړیوالو بنسټونو ترمنځ اړیکې نوې مرحلې ته داخلې کړي. خو د جرمونو نړیوالې محکمې د مقرراتو له مخې، د غړیتوب د پای ته رسېدو حقوقي بهیر وخت ته اړتیا لري او سمدستي نه بشپړېږي.
