ځايي سرچینو افغانستان انټرنشنل ته ویلي چې د بدخشان ولایت د زیباک ولسوالۍ په یوه نښته کې د طالبانو د سرحدي پوستې یو قوماندان، فریدالله وحدت، وژل شوی دی. د سرچینو په وینا، دغه نښته د پنجشنبې ماښام پیل شوې او د خبر تر خپرېدو پورې لا هم روانه ده.
د سرچینو د معلوماتو له مخې، جګړه د زیباک ولسوالۍ د توپخانې په سیمه کې، د پاکستان پولې ته نږدې، هغه مهال پیل شوه چې د طالبانو مخالفو ځواکونو د دغې ډلې پر پوستو برید وکړ. ویل کېږي چې د نښتې پر مهال فریدالله وحدت، چې د طالبانو د یوې سرحدي پوستې د بلوک قوماندان و، خپل ژوند له لاسه ورکړ.
افغانستان انټرنشنل ویلي چې د فریدالله وحدت د جسد انځور یې ترلاسه کړی، خو طالبانو تر اوسه د دې نښتې یا د نوموړي د وژل کېدو په اړه رسمي څرګندونې نه دي کړې. دغه راپور هم تر اوسه د خپلواکو سرچینو له خوا نه دی تایید شوی.
ځايي سرچینې زیاتوي چې د پخوانیو محدودو نښتو برعکس، دا ځل جګړه په څو بېلابېلو محورونو کې په هممهاله ډول روانه ده او د دواړو لورو ترمنځ د ډزو تبادله دوام لري. د تلفاتو کره شمېر لا نه دی معلوم، خو د سرچینو په وینا طالبانو ته مرګژوبله اوښتې ده.
تر اوسه د برید مسؤلیت کومې ډلې نه دی منلی. ځايي سرچینې وایي چې د طالبانو مخالف ځواکونه د زیباک ولسوالۍ په غرنیو سیمو کې حضور لري او دواړه لوري د خپلو سنګرونو د پیاوړتیا لپاره نور ځواکونه د جګړې سیمې ته استوي.
د خبر تر خپرېدو پورې د طالبانو چارواکو د دې راپور په اړه رسمي غبرګون نه دی ښودلی او د جګړې د څرنګوالي او احتمالي تلفاتو په اړه نور رسمي معلومات هم نه دي خپاره شوي.
