د فرانسې د لوور موزیم د آپولون تاریخي ګالري د اکتوبر میاشتې د شاهي ګاڼو له سترې غلا وروسته، د لومړي ځل لپاره یو ځل بیا د لیدونکو پر مخ پرانیستل شوه.
اوس لیدونکي کولی شي د «مونالیزا» مشهور انځور ته د تګ پر مهال د آپولون د ښکلي تالار له زرپوښ چتونو، مجللو سینګارونو او د یوناني اساطیرو له الهام اخیستو جوړو دیوالیزو انځورونو څخه لیدنه وکړي، خو هغه شاهي ګاڼې چې د دې تالار له مهمو تاریخي آثارو څخه ګڼل کېدې، لا هم بېرته نه دي راوړل شوې.
د لوور موزیم ادارې هغه ښیښې لرونکي ویترینونه هم له تالاره ایستلي چې پخوا پکې دغه شاهي ګاڼې ساتل کېدې. له همدې امله، لیدونکي نه له غلا شویو آثارو سره مخامخ کېږي او نه هم د هغوی تش ویترینونه ویني.
د شاهي ګاڼو غلا د اکتوبر په میاشت کې د لوور موزیم د وروستیو کلونو له تر ټولو جنجالي پېښو څخه وه او د فرانسې د رسنیو او فرهنګي چارواکو پراخه پاملرنه یې ځان ته راواړوله. د دغې تاریخي ټولګې ارزښت شاوخوا ۸۸ میلیونه یورو اټکل شوی دی.
سره له دې چې د آپولون ګالري بېرته پرانیستل شوې، د شاهي ګاڼو برخلیک لا هم نامعلوم دی او دا تاریخي تالار اوس مهال د خپلې یوې تر ټولو ارزښتمنې ټولګې پرته د لیدونکو هرکلی کوي.
