د طالبانو د لوړو زدهکړو وزارت د پخواني ولسمشر حامد کرزي هغې غوښتنې ته توند غبرګون ښودلی چې د نجونو د کانکور په ازموینه کې د ګډون او د ښوونځیو او پوهنتونونو د بېرته پرانیستلو غوښتنه یې کړې وه.
د دغه وزارت ویاند ضیاءالله هاشمي د چنګاښ په ۲۴مه په اېکس کې لیکلي، د لوړو زدهکړو او د افغانستان د راتلونکي په اړه باید هغه کسان نظر ورکړي چې د خپلې واکمنۍ پر مهال یې «مثبته او عملي کارنامه» لرلې وي. هغه ادعا کړې چې حامد کرزی د افغانستان د مسایلو په اړه د څرګندونو حق نه لري او د هېواد لپاره یې «ښه تاریخ» نه دی پرې ایښی.
دا غبرګون وروسته له هغه څرګند شو چې حامد کرزي د کانکور د پایلو له اعلان سره هممهاله د نجونو د دوامدار محرومیت له امله خواشیني څرګنده کړه او یو ځل بیا یې له طالبانو وغوښتل چې د نجونو پر مخ ښوونځي او پوهنتونونه بېرته پرانیزي. کرزي په تېرو نږدې پنځو کلونو کې څو ځله د نجونو د زدهکړو د محدودیتونو د لرې کولو غوښتنه کړې، خو دا لومړی ځل دی چې د طالبانو د لوړو زدهکړو وزارت په مستقیم او توند ډول د هغه څرګندونو ته ځواب ورکوي.
په همدې لړ کې، د افغانستان د پخواني حکومت د سولې د مذاکراتي پلاوي مشر معصوم استانکزي د طالبانو د لوړو زدهکړو وزارت دریځ د اسلامي اصولو خلاف بللی دی. هغه ویلي، د نجونو د زدهکړو غوښتنه د هر افغان مشروع حق دی او هېڅوک باید د زدهکړو د حق د ملاتړ له امله ونه غندل شي.
طالبانو د ۲۰۲۱ کال په اګست کې له واک ته رسېدو وروسته د شپږم ټولګي څخه پورته د نجونو زدهکړې او د ښځو پوهنتوني زدهکړې ځنډولې دي. دغه تګلاره د ملګرو ملتونو، بشري حقونو سازمانونو او ګڼو هېوادونو له پراخو نیوکو سره مخ شوې، خو طالبان یې کورنۍ پرېکړه بولي او تر اوسه یې د بدلون کومه نښه نه ده ښودلې.
