انډي برنهم د دوشنبې په ورځ، د چنګاښ په ۲۹مه، د کییر سټارمر له استعفا وروسته په رسمي توګه د بریتانیا د نوي لومړي وزیر په توګه خپله دنده پیل کړه او ژمنه یې وکړه چې د کلونو سیاسي بېثباتۍ ته به د پای ټکی کېږدي، اقتصاد به بېرته ورغوي او د خلکو باور به پر حکومت را ژوندی کړي.
برنهم، چې په تېره یوه لسیزه کې د بریتانیا اووم لومړی وزیر دی، د «۱۰ ډاونینګ سټریټ» مخې ته په خپلې لومړنۍ وینا کې وویل، خلک د مشرانو له پرلهپسې بدلون څخه ستړي شوي او حکومت به یې د نوې حکومتولۍ له لارې سیاسي او اقتصادي ثبات رامنځته کړي.
هغه د خلکو د باور د کمېدو په اړه وویل: «زه پوهېږم چې خلک له سیاست څخه ستړي شوي دي. ستاسو غږ مې اورېدلی. موږ په کافي اندازه ښه کار نه دی کړی او باید تر دې ډېر ښه واوسو.»
نوي لومړي وزیر اعلان وکړ چې حکومت به یې د ژوند د لګښتونو د کمولو لپاره بېړني اقدامات وکړي او په راتلونکو میاشتو کې به د اقتصاد، عامه خدمتونو او د حکومتولۍ د اصلاح لپاره لس کلن پروګرام وړاندې کړي. د هغه په وینا، د دې پروګرام موخه د خلکو د ژوند د کچې لوړول، د پانګونې زیاتول او پر دولت د خلکو د باور بېرته راګرځول دي.
برنهم د بېکوره کېدو ستونزې ته د پای ټکی اېښودل د خپل حکومت لومړیتوب وباله او ژمنه یې وکړه چې د دولتي کورونو جوړول به زیات کړي، د ټولنیز ملاتړ سیستم به اصلاح کړي او د سپما شوې بودجې یوه برخه به دفاعي لګښتونو ته ځانګړې کړي. هغه د خپلې دندې له پیل مخکې د مخکیني حکومت هغه لانجمنه پرېکړه هم لغوه کړه چې له دولتي کارکوونکو یې د ډیجیټلي هویت کارت کارول غوښتل.
ټاکل شوې د برنهم حکومت د سهشنبې په ورځ د ژوند د لګښتونو د فشار د کمولو لپاره خپله لومړنۍ اقتصادي مرستندویه بسته اعلان کړي. نوموړي وویل، دا بسته به ټولې ستونزې حل نه کړي، خو د کورنیو د ملاتړ لپاره د حکومت د تګلارې څرګندونه کوي.
په همدې حال کې د نوي کابینې د جوړېدو بهیر هم پیل شوی او تمه کېږي چې په راتلونکو ورځو کې به د حکومت بشپړ ترکیب اعلان شي. راپورونه ښيي چې د سټارمر د حکومت د څو مهمو وزیرانو، د ریچل ریوز په ګډون، له وتلو وروسته به په اقتصادي ټیم کې د پام وړ بدلونونه راشي.
په بهرنۍ تګلاره کې، برنهم له دندې پیل وروسته خپله لومړنۍ ټیلیفوني خبرې د امریکا له ولسمشر ډونالډ ټرمپ سره وکړې او ویې ویل چې ډېر ژر به د اوکراین له ولسمشر ولودیمیر زلنسکي سره هم خبرې وکړي. هغه ټینګار وکړ چې له اوکراین څخه د بریتانیا ملاتړ به دوام ولري.
برنهم په داسې وخت کې واک ترلاسه کړی چې بریتانیا د کمزورې اقتصادي ودې، د ژوند د لګښتونو د زیاتوالي، د عامه خدمتونو د ستونزو، ناقانونه کډوالۍ او پر سیاستوالو د خلکو د باور د کمېدو له جدي ننګونو سره مخ ده. شنونکي باور لري چې د هغه د حکومت بریالیتوب به تر ډېره د اقتصادي ژمنو په عملي کولو، د سیاسي ثبات په رامنځته کولو او د نایجل فاراژ په مشرۍ د «بریتانیا اصلاحات» ګوند د محبوبیت په مهارولو پورې تړلی وي.
