په عامه ځایونو کې د حجاب د منع کولو طرحه، چې د مارین لوپن له پخوانیو سیاسي ژمنو څخه ده، یو ځل بیا د فرانسې د افراطي ښي اړخي «ملي اجتماع» ګوند دننه اختلافونه راڅرګند کړي دي.
په داسې حال کې چې د ګوند مرستیال سباستین شېنو په عامه ودانیو کې د حجاب د بندیز او د پراخو محدودیتونو د پلي کولو لپاره د ټولپوښتنې ملاتړ کوي، د ګوند مشر جوردن بارډیلا د دې طرحې د عملي کېدو او سیاسي پایلو په اړه شک څرګند کړی دی.
د راپورونو له مخې، مارین لوپن هڅه کوي دا اختلاف د ټولپوښتنې له لارې د خلکو رایو ته د وروستۍ پرېکړې په سپارلو سره مدیریت کړي. شنونکي وایي، دا اقدام ښایي د ګوند د کورنیو اختلافونو د پراخېدو مخه ونیسي.
د حجاب موضوع په وروستیو کلونو کې د فرانسې له تر ټولو جنجالي سیاسي او ټولنیزو موضوعاتو څخه وه او اوس، د ولسمشرۍ ټاکنو ته په نږدې کېدو سره، یو ځل بیا د سیاسي سیالیو په مهم محور بدله شوې ده.
